DILI, STLTIMORLESTE.com – Universidade mak fator determinante neebe lori mudansa ba sosiedade, ba aan rasik no kontribui ba estadu.
Liafuan nee haktuir husi Visi Ministru Operasionalizasaun Ospital, Flavio Brandao Mendes de Araujo husi abertura seminariu internasional ho tema “Hametin Saude Inan no Labarik liu husi kolaborasaun interprofisionál” iha salaun Institutu Superior Cristal, Tersa (07/06/2026).
Tuir nia, kontente mai iha universidade sira, tanba universidade mak fator determinante neebe lori mudansa ba sosiedade, ba aan no kontribui ba estadu. Seminariu nee importante tebes tanba koalia kona ba kualidade moris, neebe tenki rekoñese katak ema laos deit entidades fízika maibe entidades sosiais nomos privadu, entidades sosias nee tenki kolabora ema ho ema, mais dalabarak mos ego sira halo ema lakohi koalia ba malu.
Kualidade moris ezije ita nia kolaborasaun, interdixiplinar aproud, buat ida neebe simples maibe susar atu halo tanba ita la konsege manan ita nia-aan hanesan entidade sosial,” haktuir pajina ofisial media Ministeriu Saude neebe STL asesu Kuarta (08/07/2026).
Nia hateten, formasaun iha universidade sira liuliu hanesan ISC neebe lori espiritu Dom Bosco tenki sai duni modelu, uza momentu sira iha universidade atu sai ema ida neebe forte ho karakter personal no ho konsiensia ida forte.
Iha sorin seluk, Manorin Nain Margarida dos Santos hatete, estudante universitariu tenke aprende barak, laos deit lee deit livru ka materia neebe dosente sira fo maibe presiza akompana moa atividade sira hanesan seminariu no workshop sira. Tanba liu husi atividade nee, sira bele aprende husi matenek nain sira ia hanoin no esperensia hodi aumenta no haklean liutan sira nia konesementu sira. Alende nee liu husi seminariu nee bele lori ideia inovativu sira.
Nia afirma, seminariu nee hanesan plataforma ida neebe atu fahe konesimentu, fo ideia inovativu no atu diskute problema ida ho peritu utilizador sira atu buka solusaun pratiku. Tanba nee estudante labele baruk bainhira seminariu ruma neebe akontese iha eskola ka fatin ruma neebe presiza atu tuir, diak liu aporveita oportunidade hodi rona.
Nunee mos Estudante ISC, Alexandrino Rodriques hatete, atu haklean konesementu no hamosu ideia inovativu estudante presiza estuda, aprende no rona mos esperensia barak husi ema matenek nain sira ka peritu sira liu husi workshop ka seminariu sira neebe halao iha eskola nomos fatin sira seluk.
Nia katak, seminariu nee organiza husi estudante fakuldade siensia de saude ho objetivu atu promove kolaborasaun interprofesional entre fisioterapia, enfermajem no parteira hodi kontribui ba fortalesimentu saude inan no labarik.
Patisipante sira iha seminariu nee masimu husi estudante husi Korea no ISC.
(dom)
