DILI, STLTIMORLESTE.com – Governu Timor Leste liu husi Unidade de Missão para o Combate ao Stunting (UNMICS), iha kolaborasaun ho National Information Platforms for Nutrition (C4N/GIZ) no parseiru sira realiza Workshop, konsultasaun nasional atu finaliza no adopta kompromisu sira ba Simeira N4G nian ba 2025.
“Iha whorshop ida nee ita sei halibur parte interesada sira husi Governu, parseiru dezenvolvimentu, sosiedade sivíl no setor privadu sira atu halo revizaun no valida kompromisu estratéjiku sira neebe foka ba hadia nutrisaun inan no labarik nian, hamenus stunting no hametin sistema protesaun saúde no sosiál sira,” hatete Diretór Ezekutivu Unidade de Missão Para o Combate ao Stunting (UNMICS), Joel Maria Pereira ba jornalista sira, iha otel JL WORLD, Metiaut Dili, Segunda (24/02/2025).
Nia dehan, lompromisu hirak nee dezenvolve ona liu husi prosesu konsultasaun ida neebe mak diak liu husi revizaun meza no konsultasaun sira iha nível munisípiu nian iha Likisa no Manatuto, hodi asegura kompromisu hirak nee nia aliñamentu ho polítika nasionál sira no objetivu nutrisaun globál sira.
Iha fatin hanesan, Visi Primeiru Ministru no Ministru Koordenador Asuntu Sosiais, Mariano Assanami Sabino esplika importansia husi kolaborasaun multi-setorial no investimentu sustentavel iha nutrisaun mak asegura nutrisaun neebe adekuadu ba ema hotu, liu-liu ba feto no labarik sira, nee fundamental ba Timor Leste nia dezenvolvimentu.
“Kompromisu sira nee reprezenta pasu krítiku ida ba populasaun ida neebe saudavel liu no reziliente liu,” nia esplika.
Nunee, Reprezentante Uniaun Europeia iha Timor Leste, Marc Friedrich dehan, UE kompromisu atu hadia nutrisaun iha nível mundiál no fó apoiu ba nasaun sira hanesan Timor Leste atu hetan progresu neebe sustentavel.
(jen)
