DILI, STLTIMORLESTE.com – Universidade Nasional Timor Lorosae (UNTL) realiza serimonia solene graduasaun XXXIV, Bacharelato, Lisensiatura, Pro Graduasaun no Mestradu iha loron dahuluk bá graduadu 727.
Iha Kinta nee (25/06/2026), UNTL realiza serimonia solene graduasaun bá dala XXXIV ho tema “Graduadus Kualificados, Responsaveis e Eticos na era Transformasaun Digital”. Husi Pro Graduasaun i Mestrado 51, Fakuldade de agrikultura 71, Fakuldade de engenharia 150, Siensias i teknologia, Fakuldade de siensias exatas i naturais 7.
Entretantu iha Kuarta loraik (24/06/2026), Reitor UNTL, Joviano António da Costa hatete, graduasaun ba loron daruak iha loron 26 Julhu 2026 iha mudansa, tanba situasaun lutu nasional ba falesimentu Saudozu Doutor Francisco Guterres Lu Olo.
“Bazeia ba falesimentu Saudozu Doutor Francisco Guterres Lu-Olo, Governu fo sai Dekretu Governu Nú. 4/2026 kona-ba lutu nasional hodi fo omenajen ba nia,” dehan nia.
Reitor hatete, programa graduasaun ba loron primeiru iha Kinta (25/6/2026), sei lao tuir programa neebe prepara ona. Entretantu, graduasaun ba loron daruak, neebe marka ba Sesta (26/06/2026) sei muda ba Segunda (29/06/2026).
“Hau husu deskulpa ba graduandu sira hotu, liu-liu sira neebe sei partisipa iha graduasaun loron daruak, tanba mudansa orariu ida nee. Mudansa nee laos tanba situasaun ordinariu, maibe rezultadu husi desizaun nivel nasional tuir dekretu governu no koordenasaun entre universidade ho autoridade kompetente sira,” dehan nia.
Nia katak, nee laos situasaun neebe akontese loro-loron. Tamba nee, liu husi koordenasaun regular ho Governu, hodi deside muda programa graduasaun loron daruak ba Segunda.
Reitor husu ba graduadu no família sira atu fo komprensaun ba desizaun ida nee no hein too data foun neebe determina ona.
(dom)
