DILI, STLTIMORLESTE.com – Urna Dom Alberto Ricardo da Silva to’o iha Tasi Tolu, Dili, husi Semiteriu Maloa, Segunda, oras 04.30 loraik.
Urna Dom Alberto Ricardo da Silva to’o iha Tasi Tolu depois de sai husi Semiteriu Maloa, akompanhadu husi lideransa Igreja Katólika, padre, madre, família no fiéis sira, atu kontinua prosesu velada no despedida iha fatin ne’ebé Preladus sira prepara ona.
Tuir observasaun STL, iha Tasi Tolu, iha loron 31/08/2026, urna Dom Alberto simu diretamente husi F-FDTL. Chegada urna ne’e mos akompaña ho serimónia kultura husi Maubisse, ne’ebé kontinua ho dalan reza no kanta hamutuk to’o urna hetan fatin iha área Preladus sira nian.
Iha momentu chegada, Arsebispu Arkedioseze Metropolitana Dili, Dom Virgílio Cardeal do Carmo da Silva, SDB, hamutuk ho Dom Leandro Maria Alves no Dom Norberto do Amaral, mos akompaña prosesu ne’e. Padre, madre sarani, família no fiéis sira hamutuk hodi presta omenajen ikus no acompanha urna Dom Alberto.
Depois urna to’o iha fatin ne’ebé prepara ona, atividade relijioza kontinua.
Sarani relijiozu no relijioza sira hala’o velada, reza no kanta hodi akompaña urna no fó respeitu ba Dom Alberto Ricardo da Silva.
Prosesu iha Tasi Tolu hala’o ho atensaun boot ba seguransa, F-FDTL no PNTL hamutuk ho THS, THM, Eskuteru no Soldadu de Cristo asegura área no kontrola movimentu ema durante prosesu chegada no velada.
Presensa forsa seguransa sira nian importante atu garante katak prosesu relijiozu, kultura no despedida bele lao ho orden, tranquilidade no seguransa, liu liu tanba ema sira mai hamutuk iha Tasi Tolu atu presta omenajen ba Dom Alberto.
Chegada urna Dom Alberto Ricardo da Silva iha Tasi Tolu marka kontinuidade prosesu despedida, ho komunidade sarani, família, lideransa Igreja no ema sira ne’ebé kontinua hamutuk iha orasaun no velada.
Durante velada, fiéis sira sei kontinua reza no fó omenajen, enkuantu autoridade no entidade sira relevante mantein seguransa iha área Tasi Tolu.
Prosesu ne’e mos hatudu kooperasaun entre Igreja, família, komunidade, elementu kultura no forsa seguransa atu garante despedida ba Dom Alberto Ricardo da Silva halao ho respeitu no dignidade.
(joa)
