DILI, STLTIMORLESTE.com – Eskola sira nafatin uza produtu lokal ba programa merenda eskolar, maske produtu husi munisípiu refere la sufisiente, no sosa fali produtu iha munisipiu seluk.
Asuntu nee hatoo husi Diretor Servisu Edukasaun Munisipiu Lautem, Anibal Fernandes ba STL liu husi telefone, Kuarta nee (08/07/2026).
“Ita nian programa merenda eskolar agora daudaun lao diak hela, maske dala ruma fornesedor neebe mak atraza, maibe ita hahu hadia daudaun ona, tanba ita haree balun seidauk diak, maibe kuaze ita bele dehan diak ona. Menu nee ita uza produtu rai laran, bazeia ba produsaun husi ita nian kada munisipiu, fou-foun sira fornese nee mak la diak. Ita nian produtu lokal iha nee la sufisiente, ita tenke sosa fali iha munisipiu seluk, maibe tenke produtu lokal,” dehan nia.
Nia dehan, produtu lokal hirak nee la sufisiente, nee bele ba sosa iha Munisipiu Aileu no ba sosa iha munisipiu seluk, nee duni husu atu bele hadia programa merenda eskolar ida nee, ba oin bele sai diak liu tan, hanesan modo balun labele iha, nee bele ba sosa iha munisipiu seluk, tanba nee agora daudaun programa merenda eskolar iha nee lao diak hanesan baibain.
“Maske iha falhansu ruma iha nafatin, maibe ita husu sira bele hadia programa ida nee iha ita nian eskola sira, nee duni oras nee daudaun programa merenda eskolar iha eskola sira Munisipiu Lautem lao diak hanesan baibain, menu nee eskola idak-idak lao tuir menu neebe iha ona, no jere merenda nee bele lao diak iha eskola sira,” nia deklara.
Nia salienta, estudantes sira bele asesu programa merenda eskolar ho diak, kada loron sira bele asesu ba programa refere, maske dala ruma iha eskola balun hasoru difikuldade iha implementasaun programa ida nee, maibe too agora programa ida nee iha eskola sira Munisipiu Lautem lao diak hela.
“Ita fornese ai-haan neebe mak diak ba ita nian estudantes sira, oinsa mak uza produtu lokal neebe ita iha, dala ruma ita nian produtu nee la too, maibe ita buka meus para ba sosa produtu iha munisípiu seluk, para ita bele uza ba iha programa merenda eskolar, neebe mak daudaun nee lao iha ita nian eskola sira,” dehan nia.
Iha fatin seluk, Superintendente Edukasaun Munisípiu Dili, Cesarina C. Guterres hatete, programa merenda eskolar iha eskola sira iha Munisípiu Dili lao diak, tanba tuir inspetores sira neebe halo monitoring ba eskola sira, nee programa merenda eskolar iha eskola sira lao diak, menu neebe implementa, nee eskola sira lao tuir menu iha manual neebe mak iha ona.
“Ita nian programa merenda eskolar iha eskola sira iha Munisípiu Dili lao diak, tanba tuir Inspetores sira neebe halo monitoring ba eskola sira, nee programa merenda eskolar iha eskola sira lao diak, menu neebe implementa, nee eskola sira lao tuir menu iha manual neebe mak iha ona,” nia konfirma.
(jac)
