DILI, STLTIMORLESTE.com – Ministeriu Edukasaun liu husi Diresaun Jeral Planu Polítika Inkluzaun no Informátika (DGPPII), hamutuk ho Reprezentante Embaixador Nova Zelandia no Parseiru Dezenvolvimentu lansa ofisialmente serie videu edukativu “Ksolok Labarik” iha resintu Eskola EBC Farol.
Lansamentu nee halao iha loron Kuarta (15/04/2026), Lansa husi Diretora Jeral Planu Polítika Inkluzaun no Informátika, Odilia das Dores Martins, akompana husi dirijente relevante sira, Reprezentante Embaixador Nova Zelándia, no Parseiru Dezenvolvimentu sira.
Serie vídeu nee nuudar produsaun orjinal husi Diresaun Nasional Sistema Informatika no Teknolojia (DNSIT), neebe servisu hamutuk ho Gabinete Avaliasaun Dezenvolvimentu Kurríkular no Rekursu Pedagojiku (GADCRP) no hetan apoiu tekniku husi ekipa programa Halimar Aprende no Deskobre Susesu (HANDS) no finansiamentu husi Governu Nova Zelandia.
Inisiativa nee uza konteudu audiovizual neebe interativu hodi kria ambiente aprendizajen neebe ksolok ba labarik sira.
Iha diskursu, Diretora Jeral Odilia das Dores Martins esplika, vídeu sira nee dezenvolve ho lian neebe simples no interativu.
“Importante liu mak vídeu sira-nee ajuda labarik sira atu aplika saida mak sira aprende iha sira-nia moris loron-loron nian,” dehan nia iha pajina media sosial ME neebe STL asesu Kinta (16/04/2026).
Nia hateten, programa nee envolve mos foin-sae sira hanesan fasilitador no kriador konteudu, inklui mos partisipasaun husi inan-aman no komunidade. Atu garante katak labarik iha area remotas mos bele hetan benefísiu, Ministeriu Edukasaun sei distribui material sira-nee iha forma offline.
“Ita hatene katak iha area remota susar tebes atu asesu ba internet. Tan nee, molok lansamentu, ita prepara ona atu distribui ba eskola sira iha territoriu nasional hodi garante inkluzividade,” nia dehan.
Iha serimonia nee, ekipa DNSIT no HANDS fo mos sertifikadu apresiasaun ba tekniku no ator sira neebe envolve iha produsaun. Rekonhesimentu nee nuudar forma ida hodi fo valor ba talentu no kbiit interna Ministeriu nian neebe konsege kria konteudu edukativu ho kualidade aas.
Eventu nee remata ho ksolok husi komunidade eskolar EBC Farol, neebe sai sasin ba pasu foun Ministeriu Edukasaun nian hodi integra teknolojia iha mundu edukasaun infantil iha Timor Leste.
(dom)
