BAUCAU, STLTIMORLESTE.com – Vitima dezastre naturais (DN) iha Suku Ossohuna no Afaloicai, Postu Administrativu Baguia, Munisipiu Baucau, seidauk hetan apoiu emerjensia husi Autoridade Protesaun Sivil (APC-sigla português), tanba kondisaun estrada ba suku refere kotu iha area Basarauai, Suku Hae-Coni, Baguia.
Komandante operasaun Autoridade Protesaun Sivil (APC-sigla português) Munisipiu Baucau, Francisco Viana Freitas aprezenta, durante udan no anin boot iha terrenu Nasional inklui iha Baucau kuaze komunidade sira nia uma husi Postu Administrativu Baucau Vila, Baguia, Laga, Quelicai, Antigu, Matebian, Quelicai, Venilale no Vemasse hamutuk 40 resin afeta ba dezastre naturais, iha neebe husi Postu hirak nee kuaze APC fo ona apoiu emerjensia kompostu aihan no laos aihan, maibe iha Postu Baguia vitima dezastre naturais balu APC fo ona apoiu emerjensia no balu seidauk, tanba kondisaun estrada.
“Estrada diak sira nee ita fo ona apoiu emerjensia, ita hein hela mak Ossohuna no Afaloicai se movimentu lao ba mai ona ita mobiliza ona sasan ba, tanba ida nee ligadu ho transporte,” hateten Francisco Viana Freitas ba jornalista sira iha nia knaar fatin Tirilolo Baucau, Kuarta (01/07/2026).
Nia esplika, vitima dezastre naturais iha Suku Ossohuna no Afaloicai pur-volta 10, iha neebe too loron parte APC Munisipiu Baucau seidauk fo apoiu emerjensia kompostu aihan no laos aihan, tanba kauza husi kondisaun estrada husi Baguai Vila ba Suku rua refere kotu iha area Basarauai, Suku Hae-Coni, Postu Baguia.
Nia informa, husi uma hirak neebe afeta ba dezastre naturais parte APC identifika iha Postu Administrativu no Suku seluk balu anin mak sobu no balu afeta husi erozasaun, maibe uma komunidade neebe afeta ba dezastre naturais iha Suku Ossohuna no Afaloicai parte APC seidauk hatene kondisaun estragus, tanba kondisaun estrada APC seidauk too fatin rekoilha dadus.
“Ita lebele dehan lai hira hira, maibe ekipa sei ba identifika tiha lai para haree labele sik lai, entaun Obras Publikas halo intervensaun lalais ba estrada nee,” Francisco akresenta.
Komandante operasaun APC Munisipiu Baucau nee husu Ministeriu Obras Publikas atu halo intervensaun emerjensia ba estrada neebe hetan estragus no kotu total iha area Basarauai nunee bele fasilita hikas komunidade sira nia movimentasaun ho transporte publiku no privadu husi Baguai no Baucau Vila ba Suku Ossohuna no Afaloicai inklui fo espasu ba APC too fatin rekoilha dadus no fo apoiu emerjensia ba komunidade vitima dezastre naturais sira iha Suku rua refere.
(tom)
