DILI, STLTIMORLESTE.com – Liu husi Komunikadu Media F-FDTL nian neebe STL asesu katak, Adidu Defeza Timor Leste ba Indonézia, Koronel Renilde Guterres Corte Real e Silva, akompanha husi Adjunto Adidu Defeza, 2Ten. Fuzileiros João da Silva Soares, hala’o vizita kortezia ba Asisten Intelijénsia Panglima Tentara Nasionál Indonésia iha Markas Besar TNI (MABES TNI), Cilangkap, Jakarta Timur.
Vizita nee realiza iha Sala VIP Paban II/Hublu Sintel TNI, hanesan parte hosi esforsu diplomatiku atu hametin relasaun bilateral iha área defeza entre Timor Leste no Indonézia, liu-liu entre Tentara Nasionál Indonézia no FALINTIL-Forsa Defeza Timor-Leste (F-FDTL).
Reprejentante Asintel Panglima TNI, Kolonel AU Yudha Irawan, akompanha husi Letkol. AL Anis Munandar, simu ho di’ak no alegria vizita ida nee no reafirma kompromisu atu kontinua hametin relasaun amizade no kooperasaun neebe benefísiu ba Nasaun rua nian. Iha parte seluk, Adidu Defesa Timor-Leste mos hatoo apresiasaun ba resepsaun neebe diak no reafirma empeñu atu promove kolaborasaun konstrutivu entre instituisaun Militar rua.
Objetivu prinsipal hosi vizita ida nee mak,hametin relasaun amizade no kooperasaun bilateral, aumenta koordenasaun iha area intelijénsia Militár, promove no troka informasaun estratéjiku.
Identifika oportunidade ba formasaun, treinamentu no dezenvolvimentu kapasidade rekursu umanu.Durante enkontru, parte Asintel Panglima TNI hatudu nakloke no prontidaun atu kontinua hametin kooperasaun ho F-FDTL liu hosi mekanismu troka informasaun no dialogu regular sira. Adidu Defesa Timor-Leste mos enfatiza importánsia relasaun bilateral neebe diak, neebe durante tinan sira ikus hatudu progresu pozitivu.
Entertatu iha vizita kortezia ida nee konsidera hanesan kontribuisaun importante bá fortalesimentu relasaun institusionál entre Forsa Defeza Nasaun rua. Atmosfera enkontru nian konstrutivu, reflete vontade no amizade forte hosi parte rua atu kontinua kooperasaun.
Vizita nee mós hatudu progresu pozitivu iha relasaun bilateral entre Timor-Leste no Indonésia, liu-liu iha area defeza. Espera katak kooperasaun neebe estabelese sei kontinua kontribui ba estabilidade no paz iha rejiaun.
(jen)
