DILI, STLTIMORLESTE.com – Voluntáriu foun Korpu da Pás Estadus Unidus na’in ualu (8) halo juramentu no simu pose iha Dili, ohin.
Serimónia ne’e hala’o iha Hotel Timor, no marka inísiu sira-nia serbisu tinan rua iha Timor-Leste.
Voluntáriu na’in ualu (8) ne’e membru grupu Korpu da Pás Timor-Leste ba dala 14, ka TL 14.
Sira sei serbisu iha área edukasaun no dezenvolvimentu ekonómiku komunitáriu, hamutuk ho parseiru Timoroan sira.
Serimónia partisipa husi Prezidente Repúblika, José Ramos Horta, no Chargé d’Affaires Embaixada Estadus Unidus, Begnell.
Reprezentante Governu Timor-Leste no Governu Estadus Unidus mós partisipa iha serimónia ne’e.
Diretór Nasionál Korpu da Pás Timor-Leste, Jamie Fouss, agradese ba Prezidente Ramos-Horta tanba nia apoiu kontínuu ba programa ne’e.
Fouss mós apresia apoiu husi governu, eskola, organizasaun, parseiru Timoroan, família uma-na’in no líder komunitáriu.
“Serbisu Korpu da Pás nian simplesmente sei la posível lahó ita-boot sira,” dehan Jamie Fouss.
Fouss dehan, família no parseiru Timoroan sira ajuda voluntáriu sira komprende kultura no moris iha Timor-Leste.
Voluntáriu sira to’o iha Timor-Leste iha fulan Juñu liubá no kompleta formasaun intensivu pre-servisu iha Aileu.
Formasaun inklui lian Tetun, saúde, seguransa, kultura Timor-Leste no preparasaun téknika tuir sira-nia área serbisu.
Sira mós hela ho família uma-na’in Timoroan hodi pratika Tetun, aprende moris loroloron no integra-an ho komunidade.
Durante formasaun, voluntáriu sira partisipa iha atividade komunitária no aprende tradisaun lokál no meius subsisténsia.
Husi voluntáriu na’in ualu (8) na’in haat (4) sei apoia edukadór Timoroan sira iha aprendizajen lian Inglés.
Sira sei serbisu iha eskola pré-sekundária no sekundária iha área sira ne’ebé presiza apoiu.
Voluntáriu na’in haat (4) seluk sei apoia dezenvolvimentu ekonómiku komunitáriu, liuhosi sentru juventude no kooperativa.
Sira mós sei serbisu hamutuk ho sentru formasaun governu no organizasaun komunitária sira.
Voluntáriu sira sei hala’o serbisu iha Aileu, Baucau, Manatuto, Manufahi no Atauro.
Hafoin serimónia, sira sei ba komunidade foun no hahú serbisu hamutuk ho omólogu Timoroan.
Parseria entre Korpu da Pás no Timor-Leste hahú iha 2002, hafoin restaurasaun independénsia.
Desde ne’ebá, besik voluntáriu Korpu da Pás na’in 300 serbisu ona hamutuk ho parseiru Timoroan.
Sira serbisu iha eskola, instituisaun governu, organizasaun sosiedade sivíl no komunidade sira.
Programa ne’e apoia edukasaun lian Inglés, dezenvolvimentu foin-sa’e no dezenvolvimentu ekonómiku komunitáriu.
Objetivu programa mak promove impaktu dezenvolvimentu sustentável no dura ba komunidade Timor-Leste.
(eme)
