DILI, STLTIMORLESTE.com – World Health Organization (WHO) hamutuk Ministeriu Edukasaun (ME) ho Diresaun Regional Edukasaun no Solidariedade Sosial (DRESS) Rejiaun Administrativa Espesial Oecusse-Ambeno (RAEOA), hasae kapasitasaun ba Inspetor Eskolar sira iha Oecusse atu hasae kualidade sistema edukasaun.
Tuir Diretor Rejional Edukasaun no Solidariedade Sosial (DRESS), Vincencio Cono ba jornalista sira iha Oecusse neebe STL asesu liu husi media officer DRESS, iha Salaun Edukasaun Santa Rosa, Suku Costa, Postu Administrativu Pante Makassar RAEOA, iha loron Segunda (13/04/2026) katak, atividade ida neee atu reforsa kapasidade inspetor sira hodi halo asesmentu ba eskola seguru no hasae kualidade sistema edukasaun.
Iha biban nee, husi Diresaun Rejional Edukasaun parte ezekutivu agradese teb-tebes ba prezensa nee, atu halo nafatin indusaun, ba serbisu inspesaun edukasaun nian iha Oecusse, halo monitorizasaun, fiskalizasaun, investigasaun, prevensaun, verifikasaun no halo avaliasaun, neebe sei hatuur iha relatoriu, karik relatoriu neebe la loos, presiza halo auditoria.
“Ita labele halai sees husi auditoria, tanba eskola atu seguru, ita presiza kria kondisaun neebe seguru iha parte fiziku, ida mos parte non fiziku, liu-liu sentimentu de pertensia nuudar manorin nomos dirijente eskola nudar Timor Oan. Alende nee, fasilidade hanesan fiziku hanesan manual, kurikulu, apoiu modulus ba profesores sira atu hanorin, planu lisaun neebe elaboradu husi ME ba ensino baziku presiza haklean nafatin papel nuudar manorin, nomos papel dirijentes eskola, ho ninia administrasaun sira hotu,” dehan Diretor Rejional Edukasaun no Solidariedade Sosial RAEOA, Vincencio Cono.
Tuir dadus DRESS, total inspetor edukasaun iha RAEOA hamutuk ema 11 kompostu husi inspetor pre-eskolar, ensino baziku no tekniku vokasional, Eskola Sekundariu Jeral Publiku no Privadu ho sira nia superintendente ema nain ida, total ema nain 12. Atividade nee hanesan pasu importante atu hasaee kualidade edukasaun iha RAEOA liu husi reforsu inspesaun no boa governasaun iha setor edukasaun.
Iha biban nee, Sub-Inspetor Administrasaun Eskolar Ministeriu Edukasaun, Rodolfo Henrique Aparicio hatete, objetivu prinsipal formasaun nee, atu prepara inspetor sira bele kontinua halo monitorizasaun, fiskalizasaun no investigasaun iha nivel ezekutivu.
Nia hateten katak, servisu inspesaun importante tebes tanba atividade barak iha terenu presiza kontrolu no akompanhamentu direta, tanba knaar inspetor la limita deit ba eskola publiku, maibe inklui mos eskola privadu sira neebe iha lisensa iha TL. Tanba nee, formasaun nee importante atu hasae kapasidade iha orea fiskalizasaun no investigasaun.
Durante formasaun, partisipante sira aprende kona-ba item kontrolu hamutuk 34 neebe sei uza iha servisu iha terenu. Sira mos simu orientasaun kona-ba oinsa prepara relatoriu fiskalizasaun no investigasaun atu garante kontinuidade servisu.
Serimonia abertura nee, partisipa husi Sub-Inspetor Administrasaun Eskolar Ministeriu Edukasaun, Rodolfo Henrique Aparicio, Diretor DRESS RAEOA, Vincencio Cono, reprezentante WHO no inspetor sira husi nivel pre-eskolar, ensinu baziku, tekniku vokasional no sekundariu jeral iha RAEOA.
(jos)
