DILI, STLTIMORLESTE.com – Reprezentante WHO iha Timor Leste, Arvind Mathur husu publiku labele paniku ho Human Metapneumovirus (HMPV), tanba virus nee laos boot, maibe nee hanesan mear baibain.
Reprezentante WHO iha Timor Leste, Arvind Mathur hatoo lia hirak nee ba jornalista sira, bainhira remata halo enkontru ho Prezidente Republika, iha Palasiu Prezidensial, Nikolau Lobato, Bairo Pite, Dili, Kinta (16/01/2025).
Reprezentante WHO nee hatete, ondra boot ida mai ba nia enkontru ho Prezidente Republika, enkontru ida ohin mai update ba Prezidente Republik kona-ba situasan HMPV nia atu asegura katak, ida nee laiha perigu boot ba nasaun no laos risku no laos ameasa.
“Daudaun nee Ministeriu Saude hamutuk ho OMS oinsa mak ita nia preparasaun diak atu responde ba asuntu ida nee, entaun ida nee mak ohin hau mai hakarak update ba Prezidente Republika, aleinde nee mos hau mos hakarak hatete katak, husu ba populasaun atu labele paniku tanba virus ida nee laos virus boot, maibe nee hanesan respiratoriu komum mear baibain neebe ema ida hetan, importante nafatin foti medidas preventivas simples sira hanesan uza maskara, bainhira mear taka ibun bainhira fani no seluk tan,” katak nia.
Arvind Mathur hatutan, nia mai iha nee ho konsentimentu husi Ministra Saude, nia mai update ba Prezidente Republika katak, Timor Leste sei sai uma nain ba enkontru boot ida, enkontru internasional teknikal nia ba rejiaun sudeste Asiatiku, haree ba asuntu mudansa Klimatika neebe mak sei halao iha fulan Fevereiru.
Iha biban nee, Prezidente Republika, Jose Ramos Horta hatete, nia informadu tebes kona-ba Human Metapneumovirus (HMPV) no Prezidente Republika hanoin katak, virus nee mos laos risku ba nasaun Timor Leste, tanba nee husu labele paniku nafatin, foti medidas preventivas neebe mak iha.
(eme)