DILI, STLTIMORLESTE.com – Primeiru Ministru (PM), Kay Rala Xanana Gusmão apresia sarani sira husi sentru pastoral ba Kapela São Sebastião Hudi Laran, neebe ho fuan no laran fo kontribuisaun ba konstrusaun altar campal neebe ohin inaugura ona.
Serimonia inaugurasaun altar no lansamentu primeira pedra iha konstrusaun Kapela São Sebastião Foun Hudi Laran, nomos selebra loron São Sebastião ba dala 49, nee hetan partisipasaun husi Primeiru Ministru Kay Rala Xanana Gusmão, Ministru Komersiu Industria Nino Perreira, Administrador, Xefi Suku Bairo Pite, no sarani sira husi Sentru Pastoral Kapela Hudi Laran.
“Hau atu dehan deit, apresia sarani sira nia fuan ho laran, tanba nee hau apresia tebes ba sarani husi sentru pastoral ida nee, bele fo kontribuisaun ho fuan ho laran, no sira la husu buat ida, tanba sira fo, ita hotu kontribui oituan. Hau bele rekonhese iha fatin hotu-hotu mak ida nee, sarani sira dala ruma tinan sanulu resin tiha ona, maibe sempre fo fiar ho esperansa,” dehan PM Xanana liu husi nia diskursu bainhira partisipa iha serimonia inaugurasaun altar no lansamentu primeira pedra konstrusaun foun Kapela São Sebastião Hudi Laran, Domingu (19/01/2025).
PM Xanana hatete, nee duni sarani sira hatudu ezemplu neebe diak no maluk sira nee responsabilidade no iha kapasidade tenke hatudu, tanba ho prezensa Amu Juvito iha nee, problema iha nee laiha.
Iha fatin hanesan, Tezoreiru ba Komisaun organizadora, Cristina da Conceicao Simoes dehan, montante konstrusaun ba altar campal hamutuk US$ 9,526.75. Nee hetan kontribuisaun osan ho material husi sarani sira iha sentru ida nee nia laran.
Nunee mos Xefi Sentru ba Kapela Sentru Pastoral ba Kapela São Sebastião Hudi Laran, Faustina Brites hatete, ohin bele selebra loron São Sebastião ba dala 49 neebe sai ona mahein ba sarani sira iha sentru Pastoral Kapela Hudi Laran, nomos serimonia inaugurasaun altar no lansamentu primeira pedra ba konstrusaun kapela foun.
(jac)