DÍLI, STLTIMORLESTE.com – Primeiru-Ministru (PM), Kay Rala Xanana Gusmão deklara katak, nia sei apoia feto ida atu asume kargu Prezidente Repúblika.
Primeiru Ministru Kay Rala Xanana Gusmão hato’o kestaun ne’e liu husi diskursu durante selebrasaun Loron Feto ba dala 50, iha CCD, Sesta-feira (06/11/2026).
Iha nia diskursu, Xanana hateten katak nia apoia feto atu sai Prezidente Repúblika.
“Permite mai ha’u pessoalmente deklara, ha’u sei apoia feto ba Prezidente Repúblika”, dehan Primeiru-Ministru.
Iha okaziaun ne’e, Xanana mós enkoraja feto jerasaun foun atu kontinua estuda, dezenvolve koñesimentu no luta atu atinje sira-nia objetivu.
“Ba feto jerasaun foun sira, imi mak na’in ba futuru Timor-Leste nian. Imi la moris iha tempu okupasaun hanesan imi-nia inan-aman no avo sira, maibé imi simu nasaun independente ne’ebé sira harii ho sakrifísiu boot”, dehan Xanana.
Nia husu joven feto sira atu la husik mehi tanba pobreza, distánsia ka falta oportunidade, maibé kontinua buka koñesimentu no dezenvolve kapasidade.
Xanana mós enkoraja feto sira ne’ebé iha pozisaun lideransa atu loke odamatan ba jerasaun foun no fahe koñesimentu ho sira.
Nia subliña katak, feto hotu, inklui feto ho defisiénsia no feto iha komunidade remota, tenke hetan direitu no oportunidade hanesan.
“Ha’u hakarak haree Timor-Leste ida ne’ebé feto sira la’ós de’it simu benefísiu husi dezenvolvimentu, maibé sai na’in, lider no protagonista iha dezenvolvimentu nasionál”, afirma Primeiru-Ministru.
Xanana mós hateten katak, tinan 50 nia laran, luta ba liberdade no igualdade presiza korajen, unidade, solidariedade no kompromisu kontinuu husi jerasaun ida ba jerasaun seluk.
Nia afirma katak, responsabilidade jerasaun ohin loron mak kontinua harii nasaun ida ne’ebé ema hotu bele moris ho dignidade, justisa, seguransa no oportunidade hanesan.
(eme)
