Xanana Promete Loke Kampu Servisu, AJAR: Ida Nee Politika Diak, Presiza Realiza

Peskizador AJAR, Inocencio de Jesus Xavier. (Foto: Dok.STL)

DILI, STLTIMORLESTE.com – Sosiedade Sivil husu Primeiru Ministru Kay Rala Xanana Gusmão atu implementa promesa neebe fo sai katak, sei loke kampu trabalhu ba joven sira, nunee bele trava joven sira sai ba rai liur.

Lia hirak nee hatoo husi Peskizador AJAR, Inocencio de Jesus Xavier ba jornalista sira iha nia knaar fatin Farol, Tersa (21/01/2025).

Nia hatete, politika husi Primeiru Ministru neebe deklara, sei kria kondisaun atu hamosu empregu no hamosu servisu ba joven sira, ida nee politika diak, presiza realiza.

“Espera politika ida nee bele iha duni no bele kria empregu ba joven sira. Empregu ida nee mak modalidade, ida nee mak tenke haree no se mak sai parseiru ida ba Governu atu bele fo empregu ba joven sira, ida nee mak ita nia ajente ekonomiku sira hanesan CCI-TL neebe parseiru ba governu atu bele loke servisu, problema mak servisu iha rai laran ohin loron halo joven halai ba liur duke moris iha ita nia rai. Sira ba primeiru tanba salariu, no seluk mak servisu neebe la garante sustentabilidade, ida nee mak sai problema,” dehan nia.

Nia hatete, Primeiru Ministru iha ona hanoin atu loke kampu trabalhu, ida nee presiza agradese, maibe promete tiha mak la realiza mos sai problema fali.

Nia hatutan, se koalia kampu servisu koalia mos kona-ba ba polititu publiku iha aprosimasaun politika publika nee hatete iha buat 5 ke importante liu mak prosesu ajendamentu, depois formulasaun de ajenda, foti desizaun saida mak implementa, depois implementa.

Nunee mos Diretor HAK, Feliciano da Costa Aroujo hatete, Primeiru Ministru iha vontade hakarak haree ba situasaun sira nee, maibe espektativa husi HAK mak antes nee hatete, atu halo desentralizasaun nee diak oinsa loke kampu trabalhu iha munisipiu hotu-hotu.

“Hau hanoin ida nee hanesan mos solusaun alternativu diak, espektativa ida katak Primeiru Ministru bele tau atensaun hanesan nee orienta membru Governu atu bele haree ida nee, kestaun ida kampu trabalhu nee mak haree tan dala ida oras nee joven hira mak sai ona ba rai liur, honestu deit prosesu ba dokumentus sira nee mak la difisil la difikulta sira, hau hanoin joven iha Timor laran sai hotu nee Timor sei hanesan fali nasaun polaka nia no nasaun seluk,” katak nia.

Nia dehan, deklarasaun neebe hatoo nee PM hatene didiak ona, maibe membru Governu sira mos presiza esforsu tuir planu neebe PM iha ona.

(eme)

Share it :

Leave a Reply

Your email address will not be published. Required fields are marked *