DILI, STLTIMORLESTE.com – Primeiru Ministru (PM), Kay Rala Xanana Gusmão hatete, semana mai sei viajen ba Rejiaun Administrativa Espesial Oekusi Ambeno (RAEOA), hodi rezolve problema ordenamentu no planeamentu.
Xefe Governu hatoo lia hirak nee ba jornalista sira, bainhira remata halao enkontru semanal ho Prezidente Republika, Jose Ramos Horta, iha Palasiu Prezidensial, Nicolau Lobato, Bairo Pite, Dili, Kinta (13/02/2025).
Primeiru Ministru dehan, nia mos relata ona ba Prezidente Republika Jose Ramos Horta katak, semana mai sei viajen ba iha ba iha RAEOA hodi rezolve problema ordenamentu de planeamentu.
“Hau mos dehan ona ba Prezidente katak, Segunda semana mai nee hau iha Oekusi atu rezolve problema ornedenasaun de planeamentu, tanba RAEOA kria tiha tinan 10 liu ona haree mak pante makasar,” Katak PM, Xanana.
Foin daudaun kria no IX Governu haree mos ba problema boot tebes iha rai boot neebe dehan karik ladun tau atensaun, maibe semana mai Primeiru Ministru sei ba hodi diskute.
“Semana mai nee hau sei ba hodi diskute, diskute ho Atoni sira, diskute ho Prezidente Autoridade RAEOA responsavel ba dezenvolvimentu, tanba ZEEMS lo-loos nee dehan katak se Governu lokal ita temi rai nia oan mak kaer, hau husi Manatutu hau labele ba kaer fali Governu lokal iha Aileu, Suai nee labele tenke iha Manatutu, neebe ZEEMS nee ita lori ema sira ba para prepara Atoni sira para sira mak atu kaer,” katak nia.
Iha biban nee Primeiru Ministru mos dehan, Timor ladun iha mentalidade bisnis, mentalidade bisnis nia katak atividade ida oinsa mak osan bele mai, oituan importante mai beibeik, agora Timor lae, hakarak osan tama ohin kedas sai riku kedas.
“Ita haree deit sira ida faan nee sosa husi nee no sosa husi neeba mai han fuan rua dolar 1 ou fuan tolu dolar 1 hakarak sai kedas riku, se Primeiru Ministru mak hola tolu dolar 10 ba neeba seidauk iha mentalidade bisnis, bisnis nee ita halo ho diak importante tanba diak baratu ema mai beibeik nee mak osan tama hodi ida nee mak ita reforsa, ita reforsa ho dignu tan ona,” katak PM.
Primeiru Ministru dehan, se faan ba 25 sentavus ema mai beibeik hola tinan 2 mai fali faan 65 sentavus tanba kondisaun diak, se diak liu ona mai tan faan ba 1 dolar importante faan ho diak baratu depois mak sae neineik.
“Bisnis nee laos halo osan, maibe bisnis nee katak halo atividade neebe sei lori osan mai, tanba nee mak tenke prepara buat sira nee hotu,” katak PM, Xanana
Aleinde nee Xanana dehan, sei despedida Mr Mrco Sprizzi, tanba nia kontribuisaun makaas mak lori Santu Padre Papa Francisco mai Timor Leste.
“Hau tenke fila, hau despedida ho Marco Sprizzi nia atu fila, no prezidente mos dehan tiha ona sei halo festa despedida ida ho nia, horiseik Konselhu Ministru mos ami hasai rezolusaun ida para husu ba parlamentu atu hasai sai hanesan votu de louvor ida ba nia, tanba nia esforsu aan atu lori Papa Francisco mai, maibe nia hurlele fali ita, ita esforsu aan para Papa mai buat hotu lao diak,” hakotu.
(eme)
