DILI, STLTIMORLESTE.com – Xefe Suku Afaloicai, Munisípiu Viqueque, husu MSSI apoia família vulnerável, no Ministra Verónica das Dores promete avalia proposta.
Ministra Solidariedade Sosiál no Inkluzaun (MSSI), Verónica das Dores, afirma katak ministériu sei avalia pedidu autoridade lokál, tuir kalendáriu no ordem proposta ne’ebé tama.
Verónica hato’o deklarasaun ne’e ba jornalista STL, hafoin remata enkontru ho Prezidente Repúblika, José Ramos-Horta, iha Palásiu Prezidensiál Nicolau Lobato, Bairru Pité, Sesta-feira (30/10/2026).
“Pedidu ne’ebé fó uluk, ami atende uluk, depois pedidu ne’ebé fó ikus, ami sei haree tuir kalendáriu,” dehan Verónica.
Ministra informa katak, MSSI planeia hala’o vizita servisu durante loron 12 to’o 14, hodi avalia pedidu sira ne’ebé autoridade lokál hato’o.
“Sei haree tuir pedidu ne’ebé xefe suku no xefe aldeia hato’o, bazeia ba nesesidade komunidade,” nia afirma.
Verónica esplika katak, MSSI iha responsabilidade atu fó asisténsia imediata ba grupu vulnerável, liuhusi distribuisaun ai-han no materiál nesesidade bázika.
“Ami nia apoiu mak ai-han no materiál nesesidade bázika imediatu ba komunidade ne’ebé presiza,” nia hatete.
Nia hatutan katak, MSSI iha koordenadór iha nivel munisipál no postu administrativu, atu akompaña pedidu sira ne’ebé autoridade lokál hato’o.
Koordenadór sira sei halo avaliasaun inisiál kona-ba nesesidade komunidade, organiza asisténsia imediata no prepara vizita servisu tuir kalendáriu ministériu nian.
Antes ne’e, Xefe Suku Afaloicai, Casario Nascimento Pires hatete katak, rezultadu monitorizasaun hatudu família barak iha suku ne’e sei enfrenta kondisaun moris vulnerável.
Nia esplika katak, família balu hela iha uma ne’ebé la dignu, tanba ne’e husu Governu fó asisténsia bázika no apoiu atu hadi’a uma.
Casario hein katak, MSSI no ministériu relevante sira bele fó atensaun ba família vulnerável iha Suku Afaloicai, Postu Administrativu Uatulari, Munisípiu Viqueque.
Nia konsidera apoiu Governu importante atu responde ba nesesidade bázika no hadi’a kondisaun moris família sira ne’ebé enfrenta difikuldade ekonómika.
(eme)
