DILI, STLTIMORLESTE.com – Daudaun nee iha Instituto Nacional de Farmácia e Produtos Médicos (INFPM) stok aimoruk sei iha 85%.
Tuir Diretora Ezekutiva Instituto Nacional de Farmácia e Produtos Médicos (INFPM), Paulina Mendonça Maher katak, aimoruk iha Armazen INFPM sei iha stok 85% no produtu desponível nee iha 15% deit mak enfrenta stok out, maibe stok out nee iha prosesa kompra.
“Aimoruk neebe stok out, INFPM daudaun nee halao hela prosesu normal ba kompra. Iha momentu hanesan, ami responde ona ba pedidu husi Hospitál Nasionál Guido Valadares (HNGV), Hospitál Referal sira, no Sentru Saude sira neebe presiza,” hatete Diretora Ezekutiva Instituto Nacional de Farmácia e Produtos Médicos (INFPM), Paulina Mendonça Maher ba jornalista sira iha salaun INFPM, Tersa (11/08/2026).
Nia esplika, iha sesta feira semana kotuk, produtu mediku kontainer 4 tama ona iha Armazén INFPM no hahu husi fulan Agostu too Dezembru, aimoruk sei kontinua tama kada semana.
“Kontainer 4 neebe foin daudaun tama nee inklui Konsumáveis, Reazentes no Medikamentus. Ekipa R&I daudaun halo hela inspesaun, hafoin de inspesaun sei entrega kedan ba Diresaun Armazén hodi halo distribuisaun tuir pedidu husi parte relevante sira,” nia informa.
Nia haktuir tan, vitamina ba inan isin rua no vaksina Anti-Rábia mos tama ona. Maske nunee ba vaksina Anti-Rábia, INFPM sei entrega ba instituisaun relevante hanesan SNI, tanba nee sira nia parte.
Nia deklara, kompromisu atu garante kontinuasaun fornesimentu aimoruk no produtu mediku sira ba fasilidade saude hotu iha territoriu nasional hodi fo atendimentu neebe diak ba povu iha rai doben ida nee.
Iha fatin ketak, pasiente Antonita Ximenes informa, aimoruk iha Sentru Saude Comoro daudaun nee sufisiente ona, tanba aimoruk Captopril no parastamol iha.
“Hau moras tensaun neebe hau toman hemu mak aimoruk captopril, aimoruk seluk labele, iha fulan kotuk mai, hau aimoruk laiha entaun sira fo seluk maibe hau lakohi, hau ba hola iha klinika privadu sira, tanba tensaun nee tenke hemu aimoruk, la hemu tauk ita monu ba kondisaun grave,” nia afirma.
(jen)
