DILI, STLTIMORLESTE.com – Too agora konsesaun eskolar seidauk tama, tanba ho mudansa estrutura Eskola Hotelaria no Turizmu Bekora presiza troka fali naran iha konta bankaria haruka ba Ministeriu Finansas.
Haktuir Diretor Eskola Hotelaria no Turizmu Becora, Charles F. Guterres ba jornalista STL iha nia knaar fatin Bekora, Segunda nee (16/06/2025).
“Kona-ba konsesaun eskolar too agora seidauk tama, tanba ho mudansa ba estrutura eskola nian presiza troka fali naran iha konta bankaria no haruka karta ba Ministeriu Finansas mak foin bele foti osan. Ami nian total estudantes hamutuk 315, maibe konsesaun eskolar nee kada estudantes sei hetan US$ 2, nee duni ami presiza troka fali naran iha ami nian konta bankaria, ho nunee lori ba Ministeriu Finansas para bele foti konsesaun eskolar,” nia esplika.
Charles hatutan, Eskola Hotelaria iha Departamentu 4, tanba nee konsesoins eskolar seidauk tama, maibe bainhira troka naran iha konta bankaria bele haruka ba iha Ministeriu Finansas para bele foti osan ida nee.
Iha parte seluk, Diretor Eskola Sekundáriu Téknika Vokasional ba Indústria no Teknólojia (ESTV-IT) 28 de Novembru Bekora, Tomas Pinto dehan, agora daudaun sira nian konsesoins eskolar tama ona, no agora daudaun atu ezekusaun ona osan refere.
“Ami nian konsesoins US$ 4.499, husi fulan Janeiru too Junhu nian, husi estudantes 409 pessoas no vezes ba $ 2 no vezes tan 11 meses dividir 2 tan mak foin hetan metade husi fulan 11,” nia esplika.
Nia dehan, konsesoins eskola nee hodi bele haree asuntu importante liga ba nesesidade eskola nian, tanba osan nee foin mak tama, nunee sira sei ezekuta tuir nesesidade eskola nian presiza neebe iha.
(jac)
