DILI, STLTIMORLESTE.com – Ministériu Saude (MS) liu husi Servisu Nasionál Ambulansia Emerjensia no Medikamentu (SNAEM) durante fulan Janeiru too mai iha Marsu, SNAEM evakua pasiente iha Munisípiu 13 inklui RAEOA hamutuk nain 540.
Nia dehan, durante fulan tolu nia laran nee SNAEM evakua pasiente emerjensia mai iha Ospitál Nasionál Guidu Valadares (HNGV) hamutuk pasiente nain 540 mak ba halo tratamentu iha hospital.
“Ita evakuasaunn mai iha emerjensia 13 Munisípiu inklui RAEOA iha 2025 primeira trimestral hamutuk 540 pasiente, ida nee mak ita halo transferensia no restu sira nee ita seidauk akumula hamutuk,” hatete Diretór Jeral SNAEM, Simplicio Amaral ba jornalista sira iha iha CNE, Segunda (16/06/2025).
Nia esplika, evakuasaun emerjensia nee maiória inan isin rua ka maternidade, tanba sira ne’e mai ho moras oin-oin deit.
“Medikal nee kazu barak liu inan isin rua, iha ne’ebá temi ona inan isin rua ka maternidade mak barak liu, nee moras oin-oin mak engloba ona iha laran, hanesan abortus, agresivu kompletu, reklamasia no partus komplikadu nee tama hotu iha laran, tanba nee husi dadus sira nee maternidade mak domina liu iha laran,” nia informa.
Tuir nia katak, Servisu Ambulansia laos kondutor mesak deit mak ba tula pasiente, maibé ita iha Doutór, Parteira, Infermeiru no kondutor sira ita treinadu hotu mos salva vida baziku, tanba nee mak servisu baziku ba primeiru sokoru.
“Inan isin rua balun ou kualker moras neebe iha baze presiza halo transferensia sira halo uluk intervensaun médiku, sira labele foti no tula de’it hanesan kareta tula rai henek no fatuk, maibe antes sira tula ita nia pasiente sira, sira halo uluk intervensaun ka asesmen tanba sira mos hetan hotu treinamentu no sira mós Profisonal Saude,” nia relata.
Simplicio deklara, iha area rural nee problema sira neebe hasoru mak estrada, rai monu, rai halai ho inundasaun, entaun ita nia veikulu ambulansia labele evakua pasiente, tanba nee mak ita boot sira haree iha Facebook katak, iha nia fmailia sira ou nia maun sira tula pasiente, nee la signifika katak SNAEM la ba intervensaun, maibe sira halo koordenasaun ho autoridade lokal sira hodi evakua ba iha fatin seguru mak Profisionál Saúde sira no Ambulansia sira ba evakua iha Sentru Saude sira.
“Ita kolabora ho xefe suku lokal, PNTL ho joven sira hodi nunee kareta Polisia mos ba, kareta Ambulansia mos ba tanba dalan neebe ita asesu la diak, entaun ita nia Profisionál Saude sira labele tama, kareta mos labele tama, tanba nee mak sira hulan deit mai iha fatin seguru mak ita nia ekipa ho kareta ba iha fasilidade saúde,” katak nia.
Iha fatin ketak, Familia Pasiente Veronica de Jesus informa, pasiente tula mai iha HNGV susar, tanba Ambulansia iha Sentru Saúde ba tula iha area rural nee labele, tanba udan boot, estrada aat.
“Ami horiseik mai husi Aileu Saburia, nee hakur mota mak foin mai Sentru Saude Aileu, no depois evakua mai iha HNGV, liu mota nee ami mesak hulan deit pasiente , tanba udan no mota tun kareta multifunsaun labele asesu hodi ba tula pasiente,” nia afirma.
(jen)
