DILI, STLTIMORLESTE.com – Uma kain 13 neebe hela iha areador Ensinu Baziku Sentral (EBC – sigla português) 10 Dezembru Komoro simu ona karta notifikasaun husi Terras Propriedade no Prezidente Autoridade Munisipiu hodi hamamuk fatin.
“Dadus ita nia komunidade hela iha areador eskola nee ita foti ona, iha fulan Marsu tinan nee no iha fulan Abril halo enkontru ho komunidade sira neebe okupa eskola, depois iha fulan Maiu notifikasaun primeiru husi Prezidente Autoridade Munisipiu Dili, liu husi Edukasaun Munisipiu Dili, tanba eskola nee pertensia Edukasaun Munisipiu Dili nian, entrega ba EBC no Ensinu Sekundariu kontinua distribui ba komunidade sira. Nee duni husi Autoridade Munisipiu Dili hahu husi dia 19 Maiu notifikasaun tun loron 30 too 19 termina ona hamamuk fatin,” dehan Diretor EBC 10 Dezembru Komoro, Calistro A. Guterres ba jornalista STL, Tersa nee (17/06/2025).
Nia dehan, agora daudaun sira sei iha nee, maibe ho karta notifikasaun nee too 19 Junhu nee tenke hamamuk ona espasu eskola nee, komunidade uma kain 13 mak simu ona Karta notifikasaun, maibe iha mos informasaun husi Ensinu Sekundariu katak, notifikasaun segundu komunidade sira simu husi Ministeriu Justisa, liu husi Terras Propriedade, dala barak komunidade sira konfundi katak, notifikasaun ida neebe mak los no la los, notifikasaun husi Ministeriu Justisa nian mos fo loron 30, nee hatun iha loron 9 Junhu too loron 9 Julhu.
“Nee duni notifikasaun primeiru no segundu nee mos tuir lei fo tempu too loron 30, komunidade mai aprezenta ona sira nian nesesidade, oinsa mak sira atu muda husi eskola ida nee ba fali sira nian hela fatin, husu transporte neebe komunidade uma kain hitu nee presiza,” katak nia.
(jac)
