DILI, STLTIMORLESTE.com – Prezidente Republika (PR), Jose Ramos Horta hatoo sentidu kondolensia no solidariedade ba Republika Cabo Verde, hafoin inundasaun katastrofika sira neebe mak akontese, iha ilha São Vicente no Santo Antao.
Iha karta ofisial ida ho data 13 Agostu 2025, neebe diriji ba Prezidente Republika Cabo Verde, Jose Maria Pereira Neves, Prezidente Republika, Ramos Horta hatoo Timor Leste nia tristeza profunda ba vida sira neebe lakon no destruisaun neebe boot kauza husi dezastre nee.
Iha karta neebe STL asesu iha loron Kinta (14/08/2025), Prezidente Republika, Jose Ramos Horta hatoo Timor Leste nia Solidariedade ba nasaun Cabo Verde.
“Iha tempu todan no sofrimentu ida nee, Timor Leste solizariza ho Cabo Verde no tau fiar ba iha reziliensia instituisaun protesaun sivil no ninia populasaun hodi ultrapasa trajedia ida nee. Hein katak esperansa no forsa husi povu cabo-verdianu sira sei lori sira hodi ultrapasa lalais situasaun ida nee”, afirma Prezidente Republika, Ramos Horta.
Prezidente Republika dehan, Timor Leste nia apoiu ba esforsu hodi fo tulun no asistensia umanitaria, sublina lasu fraternidade entre nasaun rua nee.
(eme)
