DILI, STLTIMORLESTE.com – Hahu Janeiru too Junhu tinan nee, Sentru Saude Munisípiu Baukau (SSMB) rejistu taxa natimorto ualu (8) no taxa mortalidade inan zero (0).
Liafuan nee hakuir husi Diretor Servisu Saude Munisípiu Baukau (SSMB), Cristiano Cipriano Belo ba jornalista sira iha Hotel Hilton Fatuhada, Kuarta (13/08/2025).
Nia dehan, taxa mortalidade inan iha tinan nee zero.
” Taxa Natimorto ka mortalidade ba bebe neebe mate iha inan nia kabun nain hamutuk 8,” hatete Cristiano.
Nia dehan, husi Janeiru too Junhu tinan nee, taxa mortalidade bebe nain 8, husi CHC 9 inklui husi Postu Saúde 3 neebe rejistu iha nee, laos husi Hopsital Referal Baukau ( Horex ), sira nia dadus nee ketak.
Nia informa, taxa mortalidade bebe nee ladun aas, tanba Profisional Saúde sira iha CHC nomos Postu Saúde sira nee treinadu hotu.
Iha fatin hanesan, Prezidente Autoridade Munisipiu Baukau, Veneranda E. M. Lemos Martins esplika, taxa mortalidade inan ba zero, nee atu dehan pesoál saúde servisu ho diak tebes-tebes, maibe taxa mortalidade ba bebe sira mak iha nain 8.
(jen)
