BAUKAU, STLTIMORLESTE.com – Iha loron 14 Agostu 2025 parte dader nee, sidadaun nain 2 ho motor hetan soke husi kareta ida iha estrada publiku Suku Uailili, Postu Administrativu Baukau Vila, Munisipiu Baukau.
Mediku Jeral iha sala emerjensia Hospital Rejional Eduardo Ximenes (HoREX) Baukau, Mario Sarmento hateten, vitima nain 2 neebe hetan asidente iha estrada publiku Suku Uailili mak hanesan Frofolio no Lúcio, iha neebe vitima Frofolio hetan kanek iha parte ain tur karuk no loos, iha parte ibun no ulun.
Hafoin asidente, vitima nain rua hetan transporta husi kareta ambulansia Sentru Saude Uailili too iha sala emerjensia HoREX tuku 08:40 no mediku sira halo kedas atendimentu emerjensia iha neebe nota, pasiente Flofolio hetan kanek grave natoon iha parte ulun no enkuantu Lúcio kanek kmaan iha parte ain no liman, tanba roos ba alkatraun.
“Ohin too mai haree sira nain rua hetan asidente trauma makaas, ida iha ulun ida nia liman, ida iha ulun nee mak sente grave oituan, maibe nia memoria nervozu kontroladu hela, ida seluk nia kondisaun diak, nia liman mak naksalak em jeral kondisaun diak hela,” hateten Mario Sarmento ba jornalista sira iha sala emerjensia HoREX Baukau, Kinta (14/08/2025).
Nia sublina, hafoin asidente vitima nain rua hetan transporta husi kareta ambulansia Sentru Saude Uailili too iha sala emerjensia HoREX tuku 08:40 no mediku sira halo kedas atendimentu emerjensia hodi nota, pasiente Flofolio hetan kanek grave natoon iha parte ulun no enkuantu Lúcio kanek kaman iha parte ain no liman, tanba roos ba alkatraun.
Mezmu pasiente nain rua mediku sira liu husi atendimentu nota nain ida hetan kanek grave natoon iha parte ulun no kanek kaman iha parte liman no ain, maibe mediku sira sei nafatin halo observasaun ba kondisaun jeral, nunee bele hateke klean liu tan molok fo alta ba pasiente nain rua fila uma.
Iha fatin tratamentu, vitima Lúcio Xavier Ximenes informa, sira nain 2 ho motor diresaun husi Suku Gariuai ba Uailili iha neebe too estrada publiku besik Sentru Saude Uailili hetan soke husi karreta Toyota koor mutin ida rezulta sira nain 2 monu too kanek.
“Kareta mai taka hotu dalan too iha kruzamentu besik malu, hau ho motor ba soke deit. Polisia sira ba maibe lori tiha ona ami mai Hospital mak parese sira sae ba,” Lúcio haktuir.
Vitima nee la dehan identidade kundutor neebe konduz karreta refere.
Enkuantu informasaun seluk neebe jornalista STL asesu husi ekipa parte Polisia Tranzitu Munisipiu Baukau katak, Polisia Tranzitu too kedas fatin asidente, maibe la hetan evidensia, tanba evidensia sira hanesan kareta no kareta komunidade sira muda ona husi fatin akontesimentu inklui evakua tiha ona vitima nain 2 ba HoREX Baukau ho kareta ambulansia husi Sentru Saude Uailili.
(tom)
