DILI, STLTIMORLESTE.com – Prezidente Republika (PR) Jose Ramos Horta hatete, nia viajen ba Australia nee vizita privada, maibe laos lao halimar hanesan ema balu koalia sai ba publiku.
Xefe Estadu hatete, foin fila husi Australia ba atividade loron rua hahu iha 12 too 13 Agostu nee hanesan vizita privada laiha enkontru ho elementu Governu ruma no vizita nee privada maibe laos ba halimar.
“Primeiru atividade iha neeba hau ba asiste grupu koral ida labarik oan tinan 7, 8 too 12 atus tolu resin ho sira nia pai, mai hamutuk ho profesor sira hamutuk maizumenus atus lima, labarik sira nee kanta muzika Timorense diak los susesu boot, ita haree no rona labarik oan sira nee balun fuuk mean ema Australia 100% sira kanta Timorense toka ho elementus Timorense neebe iha konjuntu muzikal ida iha neeba,” katak PR, Horta ba jornalista sira iha Palasiu Prezidensial Nicolau Lobato, Dili, Kinta (14/08/2025).
Aleinde nee iha Australia vizita mos fatin ida Cofee iha neeba sira halo importasaun kafe Timor susesu boot halo ho marketing kualidade, ema barak ba sira nia fatin sira halo kontaktu negosiasaun direita ba fornesedor kafe mai husi ema Atsabe Ermera Railaku, nee PR vizita ba segundu vez, tanba antes nee ba vizita uluk ona dala ida.
Nunee mos fo kondekorasaun ba ema lubuk ida hamutuk 40 nee elementu sira solidaridade iha Australiano ho TL, neebe uluk tempu luta sira apoia too agora seidauk rekonhese no Timoroan balu mos iha neeba. Maibe eventu boot mak iha kuarta kalan Jantar Gala uniku orador koalia kona ba dezafiu ameasa mundial.
(eme)
