DILI, STLTIMORLESTE.com – Prezidente Republika (PR), Jose Ramos Horta hatete, se la tau seguransa diak ba pasaporte Timor Leste, loron ruma nasaun seluk la simu pasaporte Timor Leste, tanba oras nee ema komesa falsifika ona.
Xefe Estadu hatoo kestaun nee ba jornalista sira, bainhira remata halao enkontru ho Primeiru Ministru, Kay Rala Xanana Gusmao iha Palasiu Prezidensial, Nikolau Lobato, Bairo Pite, Dili, Kinta (14/08/2025).
Prezidente Republika hatete, nee responsablidade Ministru Justisa nia para hadia funsionamentu instituisaun rejistu sivil, para sidadaun bele asesu justisa no asesu hetan dokumentasaun BI, karta kondukasaun ka saida iha tempu badak nee kompetensia Ministru Justisa nian, nia konsege hadia ka lae.
Buat balu sira halo sidadaun sira iha Australia tinan lubuk ida nia laran hein renova sira nia pasaporte laiha validade ona, foin daudaun ema atus lima konsege renova sira nia pasaporte maibe la sufisiente, ema iha Inglatera tan lubuk ida.
“Nee dezafiu boot ba Ministeriu Justisa, nia mak tenke nia responsabilidade, badinas, para rezolve ba emisaun pasaporte, kestaun seguransa pasaporte sira, se ita la tau matan didiak ba seguransa, ita nia pasaporte loron ruma rai barak bele la simu ona pasaporte Timor nia, tanba iha manipulasaun sira detekta iha Portugal, tanba nee mak agora prejudika Timoroan sira, tanba nee husu nasionalidade portuguesa bele hein tinan 4 ka 5 tanba iha rai laran ema balun falsifika sertidaun batizmu, nee dezafiu boot ba Ministeriu Justisa servisu hamutuk ho Ministeriu Interior PSIK hodi haree buat sira nee,” katak PR, Horta.
Aleinde nee Prezidente Republika aseita ka lae ho politika Ministeriu Justisa nian atu implementa tarefa ba iha Bilhete Indentidade no sertidaun RDTL, hatan ba kestaun nee Prezidente Republika hatete, klaru katak buat neebe selu normal ema hotu selu, maibe selu hanesan favor nee korupsaun.
Prezidente Republika afirma, tenke aselera sistema dijitalizasaun ida nee realiza laiha ona intermediadu no laiha ona broker, tanba korupasaun iha Tibar iha, korupsaun iha Mota Ain iha.
(eme)
