DILI, STLTIMORLESTE.com – Embaixadora Timor Leste ba Japaun, Maria Terezinha Viegas hatete, nia seidauk halo buat foun, maibe sei kontinua servisu neebe Embaixador anterior halao ona.
Embaixadora Timor Leste Ba Japaun, Maria Terezinha Viegas hatoo kestaun nee ba jornalista sira, bainhira remata simu pose husi Prezidente Republika, Jose Ramos Horta, iha palasiu Prezidensial, Nikolau Lobato, Birru Pite, Dili, Segunda (18/08/2025).
Embaixadora nee hatete, nuudar Embaixadora foun sei kontinua atividade neebe Embaixador anterior Elidio da Costa Ximenes halao ona, buka hametin relasaun entre Timor -Leste ho Japaun.
“Hau hanoin nuudar Embaixadora foun karik, buat foun hau seidauk bele halao, tanba iha kontinuasaun Embaixador anterior nian,” dehan Embaixadora TL ba Japaun nee.
Nia dehan, maneira neebe iha neeba nee iha mos rekomendasaun lubuk ida neebe Embaixador anterior husik hela, hakarak ka lakohi ida nee hau embaixadora tenke kontinua.
Aleinde nee Prezidente Republika nia mensajen nee la presiza verbal ka pur eskrita,maibe hakarak ka lakohi nuudar reprezenta Prezidente Republika misaun reprezenta estadu iha Governu Japaun, no mos kontinuasaun ba kooperasaun neebe halao tiha ona, no mos sei kontinua.
Nia hatete, antes assume kargu nia rejigna aan ona husi Visi Prezidente Parlamentu Nasional iha loron 16 fulan Agostu
“Ba kargu neebe hau asume, antes tomada pose, hau halo rejignasaun. Hau nia rejignasaun nee hahu efetivu desde loron 16 Agostu,” dehan nia.
Nia hatete, enfelismente hakarak ka lakohi Prezidente Parlamentu Nasional ka Visi ida mak assume fila fali urjensia nia. Tanba nia adianta, ba Visi PN foun, Parlamentu Nasional tenke eleze foun fali, iha selesaun plenaria nia laran, tanba ida nee laos indijitasaun, ka nomeasaun, atravez eleisaun.
Maibe oras nee Parlamentu Nasional agora iha resesu nia laran, Parlamentu Nasional sei agurda hela ba konvokatoriu sesaun plenaria extra-ordinaria ka mezmu ordinaria. Mais se ordinaria, depois resesu, tanba Parlamentu Nasional iha resesu hahu husi 15 Jullu too 15 Setembru.
Maneira loron 15 Setembru ba oin, Parlamentu Nasional sei entre funsionamentu normal, iha nee mak foin halo konvokatoriu ba eleisaun Vise Prezidente Parlamentu Nasional.
(eme)
