DILI, STLTIMORLESTE.com – Ohin estudantes sira iha Munisipiu Dili hahu fali merenda eskolar.
Liafuan nee haktuir husi Superintendente Edukasaun Munisipiu Dili, Cesarina Correia Guterres ba jornalista STL iha nia knaar fatin, Segunda (18/08/2025).
Nia dehan, kona-ba programa merenda eskolar ohin hahu komesa fali ona.
“Agora daudaun merenda eskolar iha EBC Fatumeta lao ona, inklui eskola seluk mos ohin merenda eskolar lao ona,” nia afirma.
Nunee mos Diretor EBC Manleuana, Carlos Correia dehan, ohin programa merenda eskolar komesa lao ona iha sira nian eskola. Osan ba merenda eskolar nee foti iha loron Sesta, no ohin kuzineira sira hahu tein merenda eskolar ba estudantes sira.
“Ami nian estudantes neebe mak asesu ba programa merenda eskolar nee, sura husi sentral ho EBF 3 hamutuk 1,294 estudantes mak asesu ba iha programa ida nee. Osan nee ba loron 54, osan refere laos foti dala ida, maibe foti kada semana deit,” nia deklara.
Carlos hatutan, kada estudantes hetan US$ 2. Osan ba programa nee EJP sira mak ba foti iha banku, tanba husi finansas transfer ba iha banku BNCTL, depois mak EJP sira ba foti.
(jac)
