DILI, STLTIMORLESTE.com – Ministeriu Ensinu Superior Siensia no Kultura (MESSK) agradese ba Instituto Nacional Ciência e Tecnologia (INCT), tanba halao formasaun kona-ba etika sientifiku ba dosentes no peskizador sira.
Ministru Ensinu Superior Siensia no Kultura (MESSK), Jose Honorio Jeronimo dehan, ohin loron primeiru mai abertura ba iha INCT nian formasaun ida kona-ba etika sientifiku. INCT hanoin katak, atu iha komisaun etika ida iha futuru, atu nunee konvida Profesor husi Pakistan mai para fo formasaun ba peskizador sira, liu-liu koalia kona-ba etika sientifiku ninia.
“Agradese ba INCT, tanba halo buat ida mais importante tebes, basa formasaun sira hanesan nee diak tebes ba ita nian dosentes no profesor sira, liu-liu peskizador sira neebe mak sei halo peskiza,” dehan nia ba jornalista iha edifisiu INCT Balide, Segunda (18/08/2025).
Nia hatete, los duni dala ruma peskizador sira halo peskiza etika sientifiku nee ladun tau atensaun, tanba nee INCT haree katak etika sientifiku nee buat ida importante tebes, tanba nee mak ohin sira mai konvida profesor husi Pakistan, peritus internasional ida neebe iha espriensia barak, tanba nee konvida mai para fo formasaun ba peskizador no dosente sira, no Reitor sira mos partisipa iha formasaun ida nee.
Nia afirma, formasaun nee halao durante loron 5 nia laran mak sei remata. Hodi ministeriu nia naran dala ida tan agradese ba INCT, neebe servisu hamutuk ho UNESCO TL no UNESCO Jakarta, hodi konvida profesor husi Pakistan mai.
Iha fatin hanesan, Prezidente INCT, Jose Cornelio Guterres dehan, iha peskiza nee mos prepara doutor sira, atu nunee bele forma etika iha futuru. Formasaun durante loron lima nian laran nee maka konaba etika peskiza ninia.
“Ohin ita realiza formasaun kona-ba etika peskiza nee servisu hamutuk ho UNESCO Dili, nomos UNESCO Jakarta ho INCT. Ami realiza formasaun nee, ami konvida profesor husi liur mak mai, hodi halo formasaun kona-ba etika peskiza,” nia haktuir.
(jac)
