DILI, STLTIMORLESTE.com – Ministru Ensinu Superior Siensia no Kultura (MESSK), Jose Honorio Jeronimo apela ba universidade no institutu sira katak, S1 labele hanorin S1 iha universidade, atu nunee bele aposta ba iha kualidade.
“Lisensiatura labele hanorin lisensiatura, maibe realidade balun iha. Karik iha universidade balun hanesan nee, Ministru apela nafatin ba sira katak, too ona tempu ita hakarak hadia ita nian kualidade ensinu iha ita nian rai. Lisensiatura labele hanorin lisensiatura, maibe karik maestradu bele hanorin lisensiatura, no lisensiatura bele hanorin diploma sira. Nee bele, maibe lisensiatura hanorin lisensiatura labele,” dehan Jose ba jornalista sira iha edifisiu INCT Balide, Segunda (18/08/2025).
Nia afirma, neebe dala ida tan husu ba universidade no Institutu sira kumpri regras nee, atu nunee bele aposta ba iha kualidade.
Nia dehan, governu kontinua fo subensaun ba sira, iha tinan ida nee fo deit ba buat tolu, ida ba dosentes, formasaun lian português no ida ba estudantes sira.
Nee duni husu ba universidade no Institutu sira katak, maestradu mak hanorin lisensiatura no lisensiatura bele hanorin diploma 3. Karik sira la kumpri, iha lei ida se mak la kumpri regras nee selu koima.
“Agora ami aplika ba instituisaun balun, hanesan ita boot sira lee karik dekretu lei kona-ba subensaun publika,” tenik nia.
Iha parte seluk Reitor Instituto Ciensia Saude (ICS), Leao Borges hatete, kona-ba dosente sira agora sira tuir ona teste iha FDCH, sira nian lima ka neen liu ona iha teste nee, maibe bainhira ba nee seidauk iha informasaun ruma.
Nee ba estudu iha area saude ninia, ba iha nasaun rua nee mak hanesan Portugal no Brazil.
“Universidade nee laos baratu, idak-idak ba ho ninia osan. Sira neebe ohin hau temi nee husi FDCH, maibe too agora seidauk iha serteza katak, bainhira mak sira atu ba iha area parteira, infarmajen, farmacia no laboratorium,” nia tenik.
Total dosentes iha ICS hamutuk 50 resin, nee permanente, no balun bolu parte tempu, parte tempu nee doutoramentu nain rua, maestradu mos iha,.maibe parte tempu hotu.
Nia afirma, dosentes ho grau lisensiatura ka S1 mos iha, sira nee hanorin diploma 3 ka D3, agora daudaun iha ona aprovasaun husi MESSK, departamentu tolu neebe mak bacharelatu sae ba lisensiatura, nee mak hanesan departamentu parteira, farmacia no nutrisaun, nee liu husi esforsu boot ida neebe mak Instituisaun halo no hetan aprovasaun iha Julhu liu ba.
(jac)
One Response
Deskulpa, se di’ak liu tun no ba diretamente iha universidade no institutu sira atu bele hare Lisensiatura Sira hanorin fali lisensiatura sira, tamba ne’e akontese barak hela iha ita nia rai laran ne’e liuliu Universidade Nasionál balun “”…