DILI, STLTIMORLESTE.com – Ekipa konjunta kompostu husi Ministériu Edukasaun (ME), Komisaun Funsaun Públika (KFP) no Institutu Nasional Seguransa Sosial (INSS) identifika profesores 34 iha Munisipiu Kovalima ho kondisaun moras, labele hanorin estudantes sira iha aula.
Kestaun nee hatoo husi Diretor Nasional Rekursu Umanu iha Ministeriu Edukasaun, João Amaral ba jornalista STL iha nia knaar fatin Vila Verde, Kuarta nee (20/08/2025).
“Agora daudaun ami iha Munisipiu Kovalima, Postu Zumalai, hodi haree ita nian profesores neebe tuir lista hatoo mai ami, ami mai iha Domingu nee no komesa iha loron Segunda nee no ami aranka kedan ba iha Postu Fohorem kontinua mai iha Tilomar, horiseik iha Maucatar, Fatululik, kontinua mai iha Zumalai ohin. Ami servisu hamutuk ho Inspetores eskolar no Diretor Eskola sira, depois ba iha sira nian hela fatin, tanba sira nian kondisaun Grave labele lao, entaun ekipa konjunta tenke ba too iha sira nian fatin,” nia esplika.
João dehan, ekipa konjunta nee mak kompostu husi INSS, KFP no husi ME rasik, ekipa konjunta tolu nee mak servisu hamutuk, nee duni hahu iha loron Segunda too ohin loron tolu ona iha Munisipiu Kovalima, nee identifika profesores 34 neebe ho kondisaun moras labele tama hanorin estudantes iha aula.
Iha fatin seluk, Diretor Servisu Edukasaun Munisipiu Manatuto, Patricio da Cruz Quintao hatete, profesores neebe mak moras prelongada nee dadus haruka ba ona iha Rekursu Umanu Nasional.
“Kona-ba ita nian profesores neebe moras prelongada nee ita haruka ona dadus ba ita nian Rekursu Umanu Nasional ME nian, atu nunee bele haree asuntu ida nee, tanba ita nian profesores balun neebe mak ho kondisaun moras nee sira labele ativu hanorin estudantes sira iha aula,” nia komenta.
(jac)
