DILI, STLTIMORLESTE.com – Ensinu Baziku Sentral (EBC – sigla português) Manleuana hahu selu ona rental nia osan, tanba halo kopia ba materia ezame segundu periodu ninia, neebe halao ona iha fulan kotuk.
“Ami nian osan konsesaun eskolar ba segundu periodu nian mos sai ona iha loron Sesta nee ami foti ona, osan ida nee hamutuk ho filial tolu nee hamutuk US$ 19.674. Osan ida nee ami sei uza ba eskola nian presiza mak hanesan kadernu zis, no buat seluk tan, tanba ami uza osan ida nee bazeia ba ami nian planu neebe mak iha tiha ona, no planu ida nee mos ami hatama ba iha ministériu,” dehan Diretor EBC Manleuana, Carlos Correia ba jornalista STL iha nia knaar fatin Manleuana, Kuarta nee (20/08/2025).
Carlos akresenta, bainhira ezekuta osan konsesaun nee, eskola tenke halo fali relatoriu ba Ministeriu Edukasaun, atu nunee osan nee bele sai fali, tanba antes nee husi sira nian eskola hatama tiha ona relatóriu, nee mak osan nee sai ona no sira foti iha Sesta nee.
“Bainhira ita la hatama relatóriu ba Ministeriu Edukasaun, san nee labele sai ida, nee duni relatoriu ida iha primeiru periodu nian hatama tiha, osan nee sai ami selu ona deve iha rental nee, tanba iha ezame segundu periodu nee eskola deve rental ba kopia materia ezame segundu periodu ninia,” nia haktuir.
Nia dehan, deve iha rental nee lunas tiha ona, tanba konsesaun eskolar sai ona, entaun husi parte eskola lori osan ida nee ba selu fali rental, tanba iha ezame segundu periodu nee rental fasilita ona halo kopia materia ezame segundu periodu ninia.
Iha fatin seluk, Diretor EBC 10 Dezembru Komoro, Calistro A. Guterres hatete, konsesaun eskolar nee sira uza tuir nesesidade eskola nian, maibe bainhira ezekuta hotu osan nee eskola presiza halo relatóriu ba ministeriu.
(jac)
