DILI, STLTIMORLESTE.com – Bainhira atu absolve graduadus neebe remata estudu iha universidade, primeiru governu tenke loke kampu trabalhu.
Kestaun nee hatoo husi Leao Borges, nuudar Reitor Instituto Ciência Saude (ICS) ba jornalista STL iha nia knaar fatin, Kuarta nee (20/08/2025).
“Universidade produs rekursus umanus, nee importante, tanba rekursus umanus importante atu dezenvolve nasaun lao ba futuru. Rekursus mos tenke relevante ho demande. Governu mak iha poder tomak atu kria kampu de trabalhu hodi bele absolve ita nian graduadus sira neebe kada tinan remata estudu iha universidade no iha institutu sira,” nia afirma.
Nia hatutan, atu hamenus numeru dezempregu, governu presiza loke kampu servisu ba joven sira no kontrola atu universidade sira garante kualidade ensinu iha TL. Kria kampu trabalhu, agora TL ukun aan ona, maibe Timoroan barak tenke buka servisu ba rai liur tanba atu hadia sira nia moris.
Iha fatin seluk, Diretor Ezekutivu TLCE, Jose Monteiro dehan, los duni too agora graduadus barak mak seidauk hetan servisu no balun ba servisu iha rai liur, tanba iha rai laran nee menus kampu servisu, tanba ho kampu servisu neebe mak menus halo graduadus barak sai ba servisu iha rai liur.
“Los duni too agora ita nian graduadus barak mak seidauk hetan servisu no balun ba servisu iha rai liur, tanba iha rai laran nee menus kampu servisu, tanba ho kampu servisu neebe mak menus halo graduadus barak sai ba servisu iha rai liur,” nia afirma.
Nunee mos Reitor ISC, Sebastiao Pereira dehan, universidade prepara deit ema, agora liga ba menus kampu trabalhu nee governu mak bele loke kampu servisu ba graduadus hirak neebe hotu ona estudu iha universidade, bainhira too tinan termina ona nee sira hahu halao graduasaun.
“Ita nian universidade prepara deit ema, agora liga ba menus kampu trabalhu nee governu mak bele loke kampu servisu ba graduadus hirak neebe hotu ona estudu iha universidade, bainhira too tinan termina ona nee sira hahu halao graduasaun,” nia dehan.
(jac)
