BAUKAU, STLTIMORLESTE.com – Eskola hamutuk 3 iha Munisipiu Baukau halo falha iha relatoriu, ezekusaun orsamentu konsensoens eskolar ba trimestral dahuluk nian, tanba seidauk intende mata dalan kona-ba ordena relatoriu konsensoens eskolar nian.
“Relatoriu primeiru periodu konsensoens eskolar eskola sira submete hotu ona, eskola publiku hotu ona, eskola Katolika rua no eskola komunidade ida, laos iha difikuldade sira hatama verifika tiha ona haruka sira hadia, tanba falha,” esplika Xefe Departementu Parke Eskolar Servisu Munisipal Edukasaun Baukau, Sabino Arlindo Ximenes ba STL, iha knaar fatin Vila Nova, Baukau, Kuarta (20/08/2025).
Nia informa, eskola 3 neebe falha iha relatoriu konsensoens eskolar mak hanesan eskola Ensinu Baziku Katolika Teulale, São Francisco Xavier Samalari Laga no eskola komunidade Ossohuna.
Tanba Eskola 3 halo relatoriu konsensoens eskolar falha, tanba foin primeira vez ezekuta orsamentu konsensoens eskolar no seidauk intende mata dalan kona-ba ordena relatoriu konsensoens eskolar.
“Buat neebe ami verifika tau sinal fo hatene sira hadia, tanba iha nee data laloos, kiar la asina. Semana oin sira submete hotu ona, tanba eskola publiku hotu ona komesa foti osan segundu periodu, Katolika rua nee ho komunidade nee mak seidauk foti nia pedidu pagamentu segundu periodu nian,” Sabino fundamenta.
Xefe Departementu Parke Eskolar Servisu Edukasaun Baukau nee akresenta, relatoriu konsensoens eskolar ba eskola 3 refere parte Edukasaun Baukau verifika ona, no tau ona marka ba relatoriu parte sala sira, nunee parte eskola bele hadia tuir hodi submete ikus iha semana nee.
Tanba eskola sira neebe relatoriu loos dadaun foti ona osan konsensoens ba segundu periodu nian, maibe falta eskola 3 refere mak sei falha iha relatoriu no too ohin loron seidauk foti osan konsensoens ba trimestral daruak nian.
Mezmu nunee maibe liu husi konfirmasaun via telefone ho eskola nee, relatoriu loos ona sei entrega hikas iha semana nee hodi prosesu mos ba trimestral daruak nian.
Entertantu eskola ensinu baziku primeiru segundu no terseiru iha Munisipiu Baukau ba anu letivu 2025 trimestral dahuluk asesu orsamentu konsensoens eskolar, mak eskola Ensinu Baziku Filial hamutuk 184, Ensinu Baziku Sentral 28 kompostu eskola publiku 17, Eskola Komunidade 2 no Eskola Katolika 9 ho total estudante 32,890 no pre-eskolar 50 ho total estudante 2005 enkuantu eskola sekundaria sentraliza iha Nasional.
(tom)
