DILI, STLTIMORLESTE.com – Prezidente Republika (PR), Jose Ramos Horta hatete, feto sira nia kontribuisaun iha tempu rezistensia makaas tebes, no sira mak asegura koezaun sosial no apoiu moral ba familia no komunidade iha tempu luta.
Xefe Estadu dehan, papel feto iha luta ba ukun rasik aan no konstrusaun F-FDTL.
“Ita labele koalia kona-ba rezistensia no dezenvolvimentu bainhira la fo onra ba knaar vital feto nian, iha FALINTIL durante luta libertasaun nasional no iha faze atual dezenvolvimentu nian. Sira maka kombatente, kuidadu nain no líder sira neebe asegura koezaun sosial no apoiu moral ba família no komunidade sira durante luta tomak,” dehan nia ambitu selebrasaun aniversariu FALINTIL ba dala 50 iha Tasitolu, Kuarta (20/08/2025).
Nia hatete, feto sira ho aten barani hasoru invazaun no konflitu hodi fo kontribuisaun desiziva, maski sira nia naran dala barak la rejista.
“Ita fo onra ba feto martir sira neebe fo sira-nia vida ba liberdade ita nia patria nian. Ohin loron, feto sira kontinua sai forsa fundamental iha konstrusaun instituisaun Estadu nian, organizasaun sosiedade sivíl sira no ita-nia Forsa Defeza Timor Leste (F-FDTL), hodi promove igualdade no garante partisipasaun ativa no buras iha ita nia nasaun nia forsa sira. Ezemplu Sosial FALINTIL Iha Tempu Rezistensia,” katak Horta.
Xefe Estadu hatete, FALINTIL laos deit forsa kombate militar ida, FALINTIL reprezenta rede solidariedade sosial no kultural ida neebe loos.
Durante tinan sira luta nian, sira kontinua serbisu esensial iha sira-nia komunidade, opera iha eskola klandestina sira hodi asegura edukasaun ba labarik sira iha kondisaun adversa, klínika movel sira neebe lori kuidadu saude baziku ba area remota no vulneravel sira, no fornese apoiu vital ba moris diak populasaun sira nian.
Kompromisu sosial ida nee krusial tebes atu hametin rezistensia kultural no prezerva identidade nasional povu nian hasoru represaun neebe brutal no naruk.
Aleinde nee, Forsa Armada sira tenke habelar sira-nia asaun sívika liu husi sira-nia unidade enjenaria, hanesan reabilitasaun infraestrutura esensial sira, responde lalais ba dezastre sira, hametin reziliensia komunidade nian, no salva vida no proteje propriedade.
(eme)
