DÍLI, STLTIMORLESTE.com – Eskola Sekundária Jerál (ESJ) 12 de Novembro, Becora, selebra aniversáriu ba dala 26, ho atividade hasai bandeira no entrega prémiu ba estudante sira.
Diretór ESJ 12 de Novembro, Marculino Menezes Babo hato’o informasaun ne’e ba STL, iha Sesta (13/11/2026).
“Ohin loron 13 mak ami selebra aniversáriu eskola nian. Atu komemora loron importante ne’e, ami realiza atividade hasai bandeira no entrega prémiu ba estudante sira. Durante tinan 26 ne’e, dezafiu prinsipál ne’ebé ami enfrenta mak kona-ba fasilidade eskola nian ne’ebé seidauk kompletu,” Marculino Menezes Babo afirma.
Nia esplika katak, dezafiu seluk mak falta ekipamentu no materiál prátiku ba disiplina sientífika, liuliu siénsia exata. Maski nune’e, eskola konsege halo progresu balun, inklui hadi’a fasilidade sira ne’ebé antes seidauk iha, liuhusi fundu konsesaun eskolár.
Diretór ne’e mós esplika katak, eskola simu naran 12 de Novembro tanba iha tempu uluk, joven barak ne’ebé partisipa iha eventu 12 de Novembro estuda iha eskola ne’e, ne’ebé uluk hanaran SMA Satu.
Tanba ne’e, depois Timor-Leste hetan independénsia, eskola ne’e uza naran 12 de Novembro atu kontinua hanoin no fó omenajen ba vítima sira iha Masakre Santa Cruz.
Nia afirma katak, to’o ohin loron, ESJ 12 de Novembro kompleta ona tinan 26 nia ezisténsia.
(jac)
