DÍLI, STLTIMORLESTE.com – Komisaun Organizadora ba Ezame III Períodu iha Eskola Sekundária Jerál (ESJ) 12 de Novembro Becora, Dili, prepara hela pontus ezame ne’ebé simu ona husi profesór sira ba kada disiplina.
Diretór ESJ 12 de Novembro, Marculino Menezes Babo hato’o informasaun ne’e ba STL, iha Sesta-feira (13/11/2026).
Nia hateten katak, komisaun agora daudaun hala’o hela prosesu elaborasaun pontus ezame, bazeia ba matéria ne’ebé profesór sira entrega ona.
“Ezame III Períodu nian agora daudaun komisaun prepara hela elaborasaun pontus ezame ne’ebé simu ona husi profesór sira ba kada disiplina. Iha semana daruak mai, komisaun sei halo multiplikasaun pontus ezame sira ne’e,” Diretór ne’e esplika.
Nia kontinua hateten katak, to’o agora seidauk iha dadus kona-ba totál estudante sira ne’ebé sei tuir ezame, tanba adjuntu diretór sei hein hela informasaun husi profesór turma ida-idak.
Iha oportunidade ne’e, Marculino Menezes Babo mós apela ba estudante sira atu hahú prepara an liuhusi estuda ho didi’ak, tanba tempu ba realizasaun Ezame III Períodu besik ona.
Nia husu estudante sira atu uza tempu ne’ebé iha atu hasa’e preparasaun no asegura katak sira prontu atu tuir ezame refere.
(jac)
