DILI, STLTIMORLESTE.com – Prezidente Repúblika (PR), José Ramos-Horta hala’o enkontru ho Prezidente Konsellu Administrasaun Open Society Foundations, Alex Soros, iha Paris, Fransa.
Enkontru badak ne’e hala’o iha loron-kuarta, iha sorin hosi edisaun ba dala 9 Fórum Pás Paris, ne’ebé halibur líder internasionál sira.
Tuir komunikadu ne’ebé STL asesu Sesta nee (13/11/2026) hatete, enkontru ne’e Troka hanoin ne’e fó oportunidade ba parte rua atu hametin kooperasaun internasionál, promove direitus umanus no buka resposta ba dezafiu globál kontemporáneu.
Envolvimentu ne’e reflete esforsu diplomátiku Timor-Leste atu hametin relasaun ho líder filantrópiku internasionál sira, ho atensaun ba governasaun nakloke, reziliénsia demokrátika no pás sustentável.
Antes enkontru iha Paris, Prezidente Ramos-Horta hasoru ona Alex Soros iha Davos, Suísa, durante Fórum Ekonómiku Mundiál, iha Janeiru 2026.
Enkontru iha Davos aborda situasaun média iha Timor-Leste, inklui liberdade imprensa, sustentabilidade média independente no dezafiu ne’ebé jornalista lokál sira enfrenta.
Iha enkontru ne’e, Prezidente Ramos-Horta entrega karta hosi jornalista lokál sira ba Alex Soros, atu hato’o preokupasaun kona-ba kondisaun setór média iha nasaun.
Alex Soros hatudu kompromisu atu apoia esforsu hodi hametin média independente no liberdade imprensa iha Timor-Leste.
Iha Setembru 2022, Prezidente Ramos-Horta mós hasoru George Soros iha Nova Iorke, Estadus Unidus, ho prezensa Alex Soros.
Diskusaun iha tempu ne’ebá aborda posibilidade apoiu hosi Open Society Foundations ba média privada, empreendedór feto no dezenvolvimentu ekonómiku iha Timor-Leste.
Open Society Foundations mak organizasaun filantrópika internasionál ne’ebé George Soros harii, ho objetivu atu promove demokrasia, direitus umanus, justisa no sosiedade nakloke.
(eme)
