DILI, STLTIMORLESTE.com – Prezidente Republika (PR), Jose Ramos Horta kondekora postumu ho onra aas liu nasaun nian ba Eroi Nain 4 neebe luta ba independensia Timor Leste.
Kondekorasaun aas liu Estadu nian nee halao iha ambitu komemorasaun aniversariu FALINTIL ba dala-50 iha Tasi-Tolu, Kuarta (20/08/2025).
Iha okaziaun istoriku aniversariu Forças Armadas de Libertação Nacional de Timor Leste (FALINTIL) ba dala 50, Prezidente no Laureadu Nobel ba Pas, Jose Ramos Horta kondekora titlu postumu ho onra aas liu nasaun nian ba eroi nain 4 neebe luta ba independensia Timor Leste nian, iha serimonia solene neebe halao iha Tasi-Tolu.
Tuir dekretu Prezidente Republika Nu. 82/2025, neebe asina iha loron 19 fulan-agostu 2025, iha Palasiu Prezidensial Nicolau Lobato, Prezidente Ramos Horta kondekora titlu postumu ho Grande Kolar Orden Timor Leste nian ba Matebian Prezidente Nicolau dos Reis Lobato “Tau Fui.”
Aleinde nee, tuir Dekretu Prezidente Republika Nu. 83/2025, neebe asina mos iha loron 19 fulan Agostu, Prezidente Ramos-Horta kondekora titlu postumu ho Grau Kolar Orden Timor Leste nian ba Kombatente Libertasaun Nasional nain tolu neebe respeitadu hanesan Joaquim Saldanha “Naha Berek, Artur do Nascimento “Tripas” no Dulce Cruz “Wewe Sahe”.
Prezidente Ramos Horta afirma, iha aniversariu FALINTIL nian ba dala 50, fo onra ba mandatu konstitusional hodi rekonese lideransa supremu Prezidente Nicolau Lobato nian no korajen imensu husi eroi sira hanesan Joaquim Saldanha, Artur do Nascimento no Dulce Cruz. Sira nia legadu mak livre no soberanu Timor Leste neebe moris iha ohin loron.
Serimonia ida nee marka pasu signifikativu ida iha kompromisu Estadu nian hodi fo onra ba pesoal hotu-hotu neebe dedika sira-nia moris ba independensia Republika Demokratika Timor Leste.
(eme)
