DILI, STLTIMORLESTE.com – Tenente Jeneral Forsa Armada Portugal, Nuno Lemos Pires ho Major Jenerál King Rose (The Cheif of Army) Forsa Nova Zelândia halo vizita kortejia ba iha Intituisaun FALINTIL – Forsa Defeza Timor Leste (F-FDTL) hodi koalia kona-ba kooperasaun bilateral.
“Nee hanesan baibain ona ba ita, tanba ema konvida ba fatin serimónia nian, nee sempre enkontru bilateral nomos ida enkontru kortejia komprimenta no agradese deit ba ita,” hatete Xefe Estadu Maiór Jenerál FALINTIL – Forsa Defeza Timor Leste (F-FDTL), Tenente Jenerál Domingos Raul “Falur Rate Laek” ba jornalista sira iha Kuartel Jenerál F-FDTL Fatuhada, Kinta (21/08/2025).
Nia esplika, sira mai vizita atu diskute kona-ba kooperasaun neebe halao tiha ona iha tempu foin daudaun no iha pasadu neeba.
“Ita ho Portugal nee, ita nia formasaun espesifiku nia agradese, liu-liu nia mai agradesimentu nia ondra, no hau fo hanoin pontus importante sira neebe hanesan kooperasaun nian no apoiu organizasaun iha saude militár, fo alimentasaun ba forsa sira, hau fo hanoin para nia ba hasoru Ministru karik em kaixa ba programa neebe kuadru neebe Governu rua preve para tau ba,” nia informa.
Aleinde nee iha mos Major Jenerál King Rose (The Cheif of Army) Forsa Nova Zelândia neebe hasoru malu ho Xefe Estadu Maiór Jenerál F-FDTL, Tenente Jenerál Domingos Raul “Falur Rate Laek” hodi komprimenta no agradese, no sei hasoru malu Indo-Pasífiku iha Tailándia, tanba nee sei iha diskusaun kona-ba kooperasaun tekniku militár nian.
“Ita diskute kona-ba kooperasaun entre parte rua nee hotu, atu koalia kona-ba kooperasaun tekniku militár nian, sira mos sei mai treinu ita kona-ba tiru manza kilat nian, depois mai fali sira mos akademia ba ita, no sira mos sei fo kursu ba formasaun sira seluk, nomos ita agradese ba banda muzika nian,” nia informa.
Entertantu Tenente Jeneral Forsa Armada Portugal, Jose Fonseca ho Major Jenerál King Rose (The Cheif of Army) Forsa Nova Zelândia neebe mai partisipa loron FALINTIL neebe komemora iha loron 20 Agustu horseik, ho ida nee sira mai vizita instituisaun F-FDTL, hodi hasoru malu ho Xefe Estadu Maiór Jenerál F-FDTL, Tenente Jenerál Domingos Raul “Falur Rate Laek” hodi koalia kona-ba koperasaun tekniku militár nian.
(jen)
