DILI, STLTIMORLESTE.com – KOICA no Fundu Nasoins Unidas ba Labarik (UNICEF) asina apoiu subvensaun ho total milhaun US$ 6, neebe sei apoia ba programa Edukasaun Infansia iha Timor Leste, husi 2024 too 2027.
Liu husi komunikadu imprensa neebe STL asesu husi media UNICEF, Kinta (28/08/2025) hatete, parseria nee inklui ko-finansiamentu US$ 400,000 husi UNICEF, sei ajuda labarik TL ho idade potensial too tinan lima, too asesu tomak ba sira-nia tinan tolu programa dezenvolvimentu infansia ho kualidade aas iha Munisípiu Bobonaro no Baukau.
Serimonia asinatura neebe halao iha eskritoriu KOICA TL nee hetan partisipasaun husi reprezentante husi organizasaun rua nee, no reprezentante husi Ministeriu Edukasaun no Ministeriu Finansas.
Subvensaun parseria nee alina ho prioridade Ministeriu Edukasaun nian atu habelar kualidade Edukasaun Infansia.
Diretora KOICA Timor Leste, Youn Hwa Kang dehan, aranju parseria ida-nee reflete kompromisu kompartilladu ba TL nia labarik sira-nia futuru, reafirma KOICA nia apoiu ba UNICEF no estabelese fundasaun forte ba edukasaun infansia.
“Iha koordenasaun ho Ministeriu Edukasaun sei identifika aldeia prioridade sira iha Baucau no Bobonaro hodi garante labarik hotu-hotu iha oportunidade atu buras,” dehan nia.
Evidensia hatudu katak, edukasaun infansia ho kualidade aas signifikativamente hasae labarik sira-nia abilidade kognitiva, inklui alfabetizasaun, numerasaun, razaun, no rezolusaun problema. Abilidade sira nee importante tebes ba prontidaun eskolar no susesu akademiku iha futuru.
Nunee mos Reprezentante UNICEF Patrizia DiGiovanni hateten, “ami sente onrada atu kolabora ho KOICA no ME, iha inisiativa ida nee iha neebe ami sei iha oportunidade atu lori edukasaun infansia ba ami nia sidadaun sira neebe joven liu” katak nia.
Nia mos apresia papel Ministeriu Finansa nian, tanba ida nee refleta kompromisu klean atu asegura labarik sira aprende no buras.
Projetu nee sei implementa iha munisípiu Baukau no Bobonaro, ho foku atu kobre komunidade sira neebe ladun hetan atendimentu no promove ekuidade iha edukasaun. Projetu nee atu suporta edukasaun infansia nian ba labarik liu 3000 ho idade tinan 3-5 iha munisípiu sira-nee. Komponente prinsipal sira husi projetu nee inklui konstrusaun ba eskola pre-eskolar publika no komunitaria hodi hadia asesu ba edukasaun pre-eskolar; hametin kapasidade forsa trabalhu pre-eskolar hodi fornese edukasaun infansia ho kualidade, inkluzivu no apoia sistema edukasaun nivel nasional no munisípiu hodi garante asesu ba edukasaun pre-eskolar ho kualidade.
(eme)
