DILI, STLTIMORLESTE.com – Deputadu sira iha Parlamentu Nasional (PN) presiza tetu didiak antes sosa kareta ba deputadu sira, tanba Primeiru Ministru Xanana Gusmão rasik deklara, osan hela tinan 4 Fundu Minarai hotu ona.
Kestaun nee hatoo husi Visi Diretur HAK, Antonino de Limas ba jornalista STL iha nia knaar fatin Farol, Kinta (28/08/2025).
Nia hatete, bele sosa kareta maibe presiza tetu didiak tanba primeiru Ministru rasik deklara ona katak osan sei hotu iha tinan 3 ka 4 nia laran.
Nia dehan, presiza haree ida neebe mak prioridade mak sosa, se balun kareta diak deputadu sira uza lai, no ida neebe mak ladiak ona mak bele sosa, nunee bele halo fiskalizasaun iha terenu.
Visi nee dehan, se kada tinan lima politika PN hakarak sosa kareta foun nafatin ba deputadu sira, sei fo impaktu boot ba Orsamentu Jeral Estadu, no bainhira osan laiha ona sei fo impaktu ba estadu no povu iha Futuru.
“Kualker asuntu programa projetu nee sempre iha kustu entau planu PN atu sosa kareta nee gasta kustu, tanba sosa kareta foun no kareta diak, nee gasta osan boot, maibe ligado ho preokupasaun husi Primeiru Ministru nia katak, osan hela oituan deit hela tinan 3 ka 4 hotu entaun mensajen mak nee ba PN atu tetu.
Nia katak, atu sosa kareta nee bele sosa, tanba haree kareta balun neebe kondisaun ladiak ona ou la funsiona ho diak maibe laos sosa kareta nee sai hanesan kedas pakote ida nee signifika katak ka,reta neebe iha kondisaun ladiak hotu ona, maibe haree ba assuntu tekniku laos hanesan nee.
Ba oin presiza haree ona deputadu sira nomos membru Governu sira atu tetu didiak iha proposta orsamentu jeral estadu, nunee labele husu programa neebe ladun prioridade nunee bele poupa orsamentu neebe ejiste, se osan nee laiha ona sei afeita ba funsionamentu estadu.
(eme)
