DILI, STLTIMORLESTE.com – Primeiru Ministru (PM), Kay Rala Xanana Gusmão ofisialmente inaugura fasilidade iha Edifisiu PT. Bank Rakyat Indonesia (Persero), Tbk, Dili, Timor Leste Branch neebe lokaliza iha Kolmera, Dili, Timor Leste, tanba ho fasilidade sira neebe BRI Dili iha bele atende diak liu tan kliente BRI nian iha nasaun Timor Leste.
Serimonia inaugurasaun neebe partisipa mos husi Diretora Treasury & International Banking PT. Bank Rakyat Indonesia (Persero) Tbk, Farida Thamrin, Woro Dwi Wuryandari husi Group Head International Business, General Manager BRI Timor Leste, Roby F. Sastraatmadja no Embaixador Republika Indonesia ba Timor Leste, Okto Dorinus Manik, halao iha BRI Kolmera Office, Dili, Timor Leste, Kinta (28/08/2025).
PM Xanana Gusmao liuhusi nia diskursu hatete katak nuudar xefe governu nia hato’o agradese ba BRI nia prezensa iha Timor Leste hodi fo kontribui no dudu ekonomia Timor Leste.
“Hau hato’o agredese ba BRI nia prezensa neebe tama ona tinan ualu (8) iha Timor Leste, maibe tanba BRI mai ikus, hau sai ona kliente Banku Mandiri nian,” dehan Xanana ho hamnasa.
Xanana mos dehan katak problema neebe nasaun nee hasoru mak falta oportunidade empregu. Tanba nee, ho prezensa BRI nian bele ajuda fo serbisu ba Timoroan sira, liu-liu ba joven sira.
“Ohin mos ami halao serimonia Dili Internasional Trade Expo 2025 iha Dili Convention Center. Ida nee atu fo motivasaun ba Timoroan sira neebe iha talentu bele halo buat ruma ba nasaun nee, tanba Timor Leste to’o agora sei dependente ba sasan importasaun, hanesan sigaru neebe estraga ema nia saude no sasan sira seluk importa husi liur,” dehan Xanana.
Xefe Governu Timor Leste nee mos dehan, problema seluk mak agora tama iha era dijitalizasaun, ema hotu kaer telefone no haluha saida mak nia atu halo.
“Labarik kiik oan seidauk hatene lee kaer ona telefone android, labarik sira, estudante sira halimar ho telefone, dala ruma haluha saida mak nia atu halo. Tanba nee, Xanana husu ba ema hotu nia kontribuisaun atu oinsa mak muda mentalidade ida hanesan nee,” katak Xanana.
Entretantu, Diretora Treasury & International Banking PT. Bank Rakyat Indonesia (Persero) Tbk, Farida Thamrin, hatete BRI nia prezensa iha Timor Leste dezde tinan 2017 ho ninia edifisiu sentral mak lokaliza iha Kolmera, Dili, Timor Leste. Iha tinan 2025 nee, aumenta tan Ruko tolu no halo luan liutan, nunee atendementu ba kliente sira diak liu tan.
“Ami agradese no orgulhu ba konfiansa neebé governu no povu Timor Leste fó mai ami. Ami buras daudaun no ami nia dezempeñu kontinua hadia. To’o tinan 2025, ami rekolha ona liu milhaun US$ 200 no dezembolsa ona milhaun US$ 62 iha empréstimu ba komunidade. Ami nia rikusoin iha nee atinje ona US$ 262 milhões. Ida ne’e maka atuasaun ida ne’ebé maka la’o hela dezde 2017,” dehan Farida.
Nia mos informa kona-ba fasilidade ATM modernu atu fasilita atendementu ba kliente sira no mos prepara fatin periority ba ema riku sira.
“BRI Timor Leste iha komitmentu atu fó apoiu ba kresimentu ekonómiku iha Timor Leste. Ami mos iha uma movel sira hodi fornese servisu sira iha neebé de’it. Agora ami nia prezensa laos deit iha Dili, maibe ami iha ona iha Baukau no Oekusi,” dehan Farida.
Atu taka ninia diskursu nee, dala ida tan Farida Thamrin hato’o agradese wain ba Governu no povu Timor Leste nia konfiansa boot ba BRI dezde tinan 2017 ate agora. BRI prontu atu apoiu ba Governu Timor Leste.
Iha sorin seluk, Embaixador Republika Indonezia ba Timor Leste, Okto Dorinus Manik hatete prezensa BRI iha Timor Leste laos deit buka lukru, maibe fo mos sira nia kontribuisaun ba kresimentu ekonomia Timor Leste.
“Ohin, BRI Timor Leste inaugura fasilidade atendimentu ida neebé ekipadu ho di’ak hodi fornese atendimentu exelente ba kliente sira. BRI komprometidu atu kontribui ba Timor Leste nia dezenvolvimentu, no dalan ida atu halo ida ne’e maka loke sub filial sira iha Munisipiu Baukau no Oekusi. Ami hein katak BRI sei sai inovador no motivador hametin Timor Leste nia ekonomia,” hatete Embaixador Okto Manik.
Nunee mos General Manager BRI Timor Leste, Roby F. Sastraatmadja dehan katak BRI Timor Leste oferese servisu lubuk ida, hahú husi poupansa to’o fasilidade empréstimu. BRI oras ne’e dadaun iha ona pontu servisu neen ba povu Timor Leste.
“Ami kontinua hasa’e fasilidade servisu sira ne’e hodi servi povu Timor Leste. Ho apoiu husi Embaixada Indonesia iha Dili, governu no komunidade, BRI kontinua hadia no dezenvolve servisu ba povu Timor Leste,” katak Robby.
Jornalista: Mikael Mali Mau
Editor: Mikael Mali Mau
