BAUKAU, STLTIMORLESTE.com – Autoridade Munisipiu Baukau aloka orsamentu US$ 200.00 ba Autoridade Postu Administrativu Baguia, hodi selebra loron konsulta popular iha loron 30 Agostu nee.
Administrador Postu Baguia, Mario Xavier da Silva esplika, selebrasaun loron konsulta popular neebe Postu Baguia planeia sei hahu ho misa agradesementu iha loron 30 Agostu hodi fo bensaun ba aifunan no lilin, hafoin lori ba vizita saudozu balun nia rate neebe identifika ona iha Postu Baguia nuudar simboliza fo onra ba eroi no eroina sira hotu.
“Fundus nee ita hetan ajudus husi Autoridade Munisipiu osan US$ 200.00 ita prepara ba lilin no misa ho tan sosa bee ruma para ita nia partisipante sira hemu netik,” dehan Mario ba jornalista STL liu husi telefone, Kinta (28/08/2025).
Selebrasaun loron konsulta popular nee tuir nia hetan partisipasaun masimu husi komunidade sira iha Postu Baguai, tanba Autoridade Postu komvida direita Autoridade Suku sira mobiliza komunidade partisipa iha selebrasaun nee, tanba loron konsulta popular mak detenina Timor nia independensia.
No planu seluk neebe Autoridade Postu iha sei sunu lilin tuir estrada publiku iha Baguia Vila nuudar jestu fo onra ba eroi no eroina sira, tanba husi sira nia esforsu Timor sai nasaun livre no independente no fanu foinsae sira koinhese istoria Timor nia luta.
“Nuudar Autoridade ita espera katak, ho selebrasaun sira nee bele hanesan motiva komunidade komemora loron nee sai loron istoriku ida ba Timor-Leste, entaun nee bele motiva ita nia komunidade kria unidade no pas iha Postu Baguai,” katak Mario.
Entretantu kona-ba selebrasaun loron konsulta popular iha nivel Munisipiu, STL tenta komfirma dala 2 Prezidente Komisaun Organizadora, Eduardo Filipe Ximenes, maibe la fo komentariu.
Maibe planu ba selebrasaun loron refere neebe STL asesu mak hanesan, iha nivel Munisipiu sei hahu iha loron 29 Agostu ho marsa saudavel husi estudante Ensinu Baziku, Sekundaria Jeral, Tekniku Vokasional, Universitariu, funsionariu husi Institusaun Estadu, Institusaun Seguransa, Komunidade, estrutura Konselhu Kombatentes Baukau, Sentru Nasional Juventude Timor-Leste, CCI neebe sei akompanha dram band husi estudante eskola Sekundaria Jeral 01 Tirilolo, Eskola Tekniku Informatika Baukau, Tekniku Vokasional no EBC Uailili.
Route ba marsa saudavel nee hahu husi husi eskola Ensinu Baziku São Domingos Savio Vila Antiga-Edukasaun-DNTT- Beskem-Terminal-INFORDEPE-EDTL- Bugaete-Tribunal-PNTL-Notariadu no remata iha resintu Administrasaun Autoridade Munisipiu Baukau.
No loron 30 Agostu iha parte dader kontinua ho selebrasaun misa agradesimentu iha Igreja Sagrada Coração de Jesus Vila Nova hafoin kari aifunan iha semiteriu Lou-Du’a, Bukoli no Fatumaka.
Jornalista: Tomas Reis
Editora: Carme Ximenes
