DILI, STLTIMORLESTE.com – Deputadu balu preokupa kona-ba lei balu, husu atu halo amandamen ba iha konstituisaun, tanba nee konsidera nesesariu maibe tenke ho votasaun maioria.
Tuir Prezidente Tribunal Rekursu, Afonso Carmona katak, fila fali ba iha votasaun husi Partidu Politiku sira, se bainhira partidu sira la hamutuk oinsa mak bele hetan maioria hodi halo amandamen. Maibe konsidera nesesariu hodi halo amandamen ba konstituisaun.
“Nesesariu sempre tanba lei dehan, tinan 6 tenke halo amandamen, maibe nia numeru nee la to, maioria 35 tanba nee tenke maioria 45 ba leten oinsa to neeba, maibe lao pasti buat diak,” dehan Prezidente Tribunal Rekursu, Afonso Carmona ba jornalista sira iha Kaikoli, Kinta (28/08/2025).
Nia hatutan, konstituisaun artigu sira preve tiha ona oinsa maka atu aplika deit, tanba nee se aplika la diak maka foin koalia konaba amandamen, maibe presiza prense nia regra nee.
Iha fatin ketak Jurista Alexandre Corte Real dehan, bele halo amandamen ba konstituisaun, tanba konstituisaun tama iha vigor dehan tinan 6 bele halo, maibe liu tiha ona.
“Agora defende sira husi Bankada sira nee tur hamutuk tanba buat nee laos fasil prense korum, sira sei diskuti saida maka sira sei halo amandamen,” dehan Alexandre.
Nia hatutan, se hakarak halao amandamen partidu sira tenke hanoin hanesan, no partidu balu neebe kestiona nee tur hamutuk hodi konkorda vota, tanba minimu nee maioria 46 votu, tanba nee bankada sira tenke tur hamutuk. Tanba nee tenke votu maioria liu liu Fretilin no CNRT.
Jornalista: Terezinha De Deus
Editor: Domingas Gomes
