DILI, STLTIMORLESTE.com – Bankada Kongresu Nasional Timorense (CNRT) iha Parlamentu Nasional (PN) husu Governu Timor Leste no Indonezia, atu rezolve problema fronteira Oekusi tuir uma lisan neebe mak iha.
Deputada Bankada CNRT, Cedelizia hatete, problema iha fronteira Timor Leste ho Indonezia problema ida neebe seriu, tanba nee envolve soberania nasaun rua nia.
Hanesan reprezentasaun povu nia kontente tanba IX Governu Konstitusional ho nasaun vizinhu Indonezia halo ona negosiasaun ida neebe seriu oinsa bele buka solusaun ba problema neebe mak iha.
Tanba nee nia husu ba Ministeriu Interiu no Ministeriu Negosiu Estranjeiru no Kooperasaun (MNEK) atu halo aprosimasaun ho Governu Indonezia hodi bele buka solusaun ba problema nee tuir uma lisan neebe mak iha.
“Tanba ita hatene komunidade iha fronteira rua Indonezia ho Timor Leste, maibe maioria ita haree parte rua nee iha relasaun familia kultura sira sei iha relasaun ba malu hela, uluk ita hamutuk depois mak ita fahe malu neebe ita hanoin katak ita bele solusiona problema nee diak liu ita hamutuk para ita nia problema fronteira nee bele rezolve tuir akordu neebe iha,” hatete Deputada ba jornalista sira,m iha Sentru Konvensaun Dili, Kaikoli, Kinta (28/08/2025).
Reprezenta povu nee mos husu autoridade Oekusi neebe mak faz parte iha vizinhu nee karik, iha ninia autoridade neebe iha neeba atu hakalma komunidade atu labele hamosu konfrontu.
“Ita haree katak iha konfrontu entre ita nia Timoroan ho sidadaun Indonezia, no iha mos vitima husi ita nia UPF no sidadaun neeba mos iha, maibe iha ema balun hatete katak ita Timor mak book uluk sira halo uluk violensia ba sira, maibe importante mak ita presiza iha investigasaun ida klaru,” dehan nia.
Jornalista: Alberto Menezes
Editor: Carme Ximenes
