DILI, STLTIMORLESTE.com – Bankada Kmanek Haburas Unidade Nasional Timor Oan (KHUNTO) ho Partidu Demokratiku (PD) levanta preokupasaun komunidade parte area Bekora Terminal, Beedois no komunidade Maslidun Tasi-Tolu neebe enfrenta bee moos ba Governu, iha Parlamentu Nasional.
Deputada Bankada KHUNTO, Ireni Gonzaga hatete, komunidade parte Bekora Terminal no Beedois kuaze fulan hirak liu ba too agora la asesu bee moos, sira halo ligasaun ilegal hodi hetan bee, tanba nee Governu tenke tau atensaun.
“Primeiru hau hakarak koalia kona-ba bee moos neebe iha parte Bekora Terminal no Beedois ninian, agora daudaun grave tebes bee moos laiha,” dehan Deputada Ireni iha Plenaria Parlamentu Nasional, Dili, Kinta (28/08/2025).
Komunidade barak tuir Deputada nee komesa halo ligasaun ilegal, tanba sira la asesu ba bee moos tan nee hakarak ka lakohi sira fura kanu sira hodi dada bee ilegal, kontador neebe monta husi BTL maibe bee nee la ba ona kuaze fulan hitu ka ualu ona.
Neebe agora daudaun komunidade iha parte refere sira komesa halo ligasaun ilegal ona para sira bele hetan bee moos, neebe husu ba parte relevante favor ida bele toma atensaun ho seriu.
“Ami husu ba BTL bele ba iha fatin para hodi haree hadia fali ligasaun bee neebe sira liga atu instala halo didiak, nunee ita nia komunidade sira bele hetan fali bee moos,” tenik nia.
Jornalista: Alberto Menezes
Editora: Carme Ximenes
