AMBENO, STLTIMORLESTE.com – Tribunal Judisiariu Primeira Instansia (TJPI) Distrital Oekusi-Ambeno hahu julgamentu Primeiru Interogatoriu ba Autor Jogus Online ho Burla Informatika ou Redi Scam Call Centre Zona Sudestiku Aziatiku neebe instala iha Otel Oeupu Rejiaun Administrativa Espesial Oekusi-Ambeno (RAEOA) hamutuk nain 6.
Julgamentu Primeira Interogatoriu nee lidera husi Juis Administrador Distrital Oekusi, Evangelino Belo ho Ministeriu Publiku, Dr. Mateus Nesi no Dr. José Elu, hetan asistensia legal husi Defensoria Publiku, Estaqiu Guterres ho Advogadu Privadu husi Kompanhia Seagull Resort, Octavio Cardoso ho Jhon Ndun, hodi fo asistensia ba sira nia kliente hamutuk nain 6 iha Primeiru Interogatoriu neebe halao iha Tribunal Distrital Oekusi-Ambeno.
Autor sira hamutuk nain 6 nee too iha TJPI Distrital Oekusi-Ambeno iha tuku 8:15 OTL no Advogadu Privadu Kompanhia Seagull Resort nain Rua akompanha husi Defensor Publiku too TJPI, tuku 9:00 no Julgamentu nee hahu iha tuku 10:14 OTL too tuku 12:00 intervalu ba Almosu no Kontinua fali iha tuku 14:00.
Autor sira nee akompanha husi Xefe Investigasaun PSIK, Dedi Alvaro da Silva ho ekipa Servisu Nasional Intelijensia (SNI) no PNTL RAEOA.
Tuir Advogadu Privadu husi Kompanhia Seagull Resort, Octavio Cardoso iha TJPJ Distrital Oekusi ba jornalista STL, Kinta nee (28/08/2025) katak, atu kumpri deit baze legal iha Primeiru Interogatoriu neebe deside ohin dadersan nee PJPI Loke audensia Primeiru Interogatoriu PJPI Distrital Oekusi-Ambeno.
“Hau nia prezensa iha nee hanesan baibain, tuir prosesu Judisial neebe agora daudaun atu halo Audensia iha Tribunal Distrital Oekusi-Ambeno, hau nia kliente hamutuk nain 6,” dehan Advogadu Privadu husi Kompanhia Seagull Resort, Octavio Cardoso.
Responde kona-ba informasaun ema nain 10 mak atu detein hodi tuir Primeiru Interogatoriu, katak ida nee Polisia Investigasaun nia servisu hodi halo levantamentu no husi nain 10 nee la prienxe rekezitus atu mai hatan iha PJPI Distrital Oekusi-Ambeno, tanba mezmu dirijente neebe ohin jornalista sira haree iha nee.
Daudaun nee Advogadu Privadu nain rua ho Defensor Pibliku ba sira nia kliente hamutuk nain 6 iha TJPI Distrital Oekusi-Ambeno mak Advogadu Privadu husi Kompanhia Seagull Resort, Dr. Octavio Cardoso ho Dr. Jhon Ndun hamutuk ho Defensoria Publiku, Dr. Estaqiu Guterres hodi fo asistensia ba sira nia kliente hamutuk nain 6 iha Primeiru Interogatoriu neebe halao iha Tribunal Distrital Oekusi-Ambeno.
Tuir observasaun jornalista STL iha TJPI Distrital Oekusi-Ambeno RAEOA, julgamentu nee rona uluk feto Malazia ida ho naran Inisial T, hahu husi tuku 10 ho balun too meudia intervalu almosu, nunee kontinua fali iha tuku 14:00 lokraik no sei kontinua halo nafatin Primeiru Interogatoriu ba suspeitu sira seluk neebe ohin tuir primeiru Interogatoriu iha TIPI Distrital Oekusi-Ambeno.
Hafoin Primeiru Interogatoriu nee remata, Juis sei halo alegasaun mak suspeitu sira rona desizaun.
Jornalista: Joseph Koa
Editor: Joseph Koa
