AMBENO, STLTIMORLESTE.com – Regio da Cruz Salu kontinua respeita Prezidente Autoridade Rejiaun Administrativa Espesial Oekusi-Ambeno (PA-RAEOA), Rogerio Tiago de Fatima Lobato ho Koodenador Ezekutivu Zona Ekonomia Espesial ba Dezenvolvimentu Oekusi-Ambeno (KE-ZEEDOA) no estrutura mandatu sei ativu too loron 31 Agostu 2025, tanba nee hahu loron 1 Setembru 2025, Regio da Cruz sei hahu pajina foun hodi asumi knaar, PA-RAEOA no Hercolanu Sousa asumi knaar KE-ZEEDOA.
“Ami sei respeita PA-RAEOA, Rogerio Tiago de Fatima Lobato nuudar Prezidente Atual neebe ninia mandatu sei remata iha loron 31 Agostu 2025, nunee loron 1 Setembru 2025 mak foin ami hahu ami nia knaar,” dehan Regio da Cruz Salu ba jornalista STL iha Oekusi, Kinta (28/08/2025).
Nia haktuir tan katak, agora daudaun PA-RAEOA ho Koordenador Ezekutivu Zona Ekonomia Espesial ba Dezenvolvimentu Oekusi-Ambeno (KE-ZEEDOA), sira sei kontinua asumi knaar iha Oekusi too 31 Agostu.
Responde perguntas jornalista kona-ba ejizensia komunidade Oekusi iha fulan hirak liu ba, bainhira Primeiru Ministru (PM), Kay Rala Xanana Gusmão halo vizita no konsulta ho povu kona-ba Desentralizasaun Administrasaun no poder lokal, povu Oekusi husu PM atu ba oin Oekusi-Ambeno oan mak ukun iha ninia munisipiu rasik, Regio dehan ida nee la reprezenta politiku nian maibe povu Oekusi espresa sira nia pesoal nuudar sidadaun neebe moris iha nasaun Republika Demokratika Timor Leste (RDTL), maibe tenke reakontalizasaun ba politika estadu nian iha rai Enklave Oekusi ba interese nasional dezenvolvimentu no nafatin familia.
“Hau hanoin aspirasaun boot neebe durante nee povu Oekusi ejize dehan Oekusi oan, ida nee ejizensia pesoal ema Oekusi nian, ida nee laos ejizensia politika, maibe povu Oekusi iha ninia karakter orgulhu ba nia aan, orgulhu ho nia diferensa, orgulhu ho estadu nia objetivu, nia imajen, tantu kadaves ita iha demokrasia, iha direitu espresaun, neebe ita prontu atu interpreta balu la prontu atu interpreta, maibe nuudar familia boot. Hau hanoin Oekusi nuudar interese estadu Timor Leste (TL) tomak no interese povu Timor oan tomak, hau hanoi, pozitivamente, hau hanesan Oekusi oan, ida nee laos ejizensia katak, Oekusi tenke Oekusi oan mak lidera ninia rejional rasik, ida nee interese pesoal ema nian, maibe hau hanoin ita tenke reakontalizasaun ba politika estadu nian, iha ita nia rai enklave nee, nesesita duni atu ita konsidera mos preokupasaun povu balun, dala ruma prodentiku, neebe hau hanoin iha prodentiku duni ba espresaun nee rasik, maibe ita nafatain tenke familia, hamriik iha kotuk no oin hamutuk ba maluk, atu ita hatudu ita nia imajen estadu nee iha prodensiu de prinsipiu ukun rasik aan iha nasaun RDTL, hau nia pensamentu moral, prodentu atu halo dezenvolvimentu,” dehan Regio Servente da Cruz Salu ba STL iha Oecusse, Kinta (28/08/2025).
Nia dehan, neste momentu, PA-RAEOA ho KE-ZEEDOA nomos ho ninia estrutura tomak, sira nia mandatu sei legalmente.
“Iha loron 1 Setembru, ami sei halao Hand Over, depois ita sei halo sesaun votus de Agradesimentu ba PA-RAEOA, Rogerio Tiago de Fatima Lobato ho Estrutura nunee, KE-ZEEDOA, João Mendes Goncalve ho ninia estrutura, depois ita sei hahu fali ho pajina foun de kooperasaun mutual ba ita nia rai Oecusse ba ita hotu,” afirma Regio.
Iha okaziaun nee, Hercolano Sousa neebe hetan nomeasaun husi Konselhu Ministru atu assume knaar KE-ZEEDOA, sente orgulhu tanba bele hetan konfiansa ida nee.
“Hau hanoin konfiansa ida nee laos previlejio boot, maibe hau haree hanesan responsabilidade boot neebe mak governu entrega ba ita Oekusi oan atu halao servisu ba ita nia rain, tanba nee mak hau fiar katak knaar ida nee todan maibe laos simu pose ona atu simu kargu ida nee, atu hadia ita nia rain, maibe ba hau agradese ba konfiansa no husu nafatin hotu-hotu nia apoiu ba serbisu durante mandate neebe fo ona mai ami,” dehan nia.
Iha okaziaun nee nia husu ba ema hotu-hotu katak, Oecusse ema hotu nian, atu lao ba oin, diak ka la diak, serbisu susesu ka la susesu ida nee fila fali ba Timor oan tomak atu serbisu hamutuk iha idak-idak nia knaar rasik neebe maka iha, idak-idak ho ninia responsabilidade rasik atu apoiu prosesu dezenvolvimentu neebe maka lao iha rai doben TL.
“Xave ba ita hotu katak, tenke serbisu hamutuk, rona malu, kompleta malu, hau fiar katak, ho knaar ida nee, ita sei lao ba oin,” dehan Hercolano Sousa.
Entretantu nomeasaun nee deside liu husi enkotru Konselhu Ministru (KM) neebe lidera husi Primeiru Ministru (PM), Kay Rala Xanana Gusmao, nomeia Regio da Cruz Salu ba kargu Prezidente Autoridade Rejiaun Administrativa Espesiál Oekusi-Ambeno nian, segundu nomea sidadaun sira tuir mai ba kargu diretór no xefe Rejiaun Administrativa Espesiál Oecusse Ambeno mak hanesan tuir mai nee, Domingos Punef nuudar Diretor Jeral Rejional, Jose Tanessib Anuno, nuudar Diretor Rejional Administrasaun, Augusto de Fátima Efi, Diretor Rejional de Planeamento no Aprovisionamento, Amâncio Aguido Punef, Diretor Rejional das Finanças, Merita Marques Caunan Lafo, Diretora Rejional da Saude, Vicêncio Cono, Diretor Rejional da Edukasaun no Solidariedade Sosial, Jose Oki, Diretor Rejional Agricultura, Orlando Quelo, Diretor Rejional do Comercio e Industria, Remígio Nuno Sila, Diretor Rejional Infraestruturas, Domingos de Almeida, Diretor Rejional Transportes no Komunikasaun, Carlos de Fátima de Almeida, Diretor Rejional Juventude no Desportu, Anastásia Eni, Diretora Rejional do Turismo, Arte no Cultura, Jose Ase Teno, Diretor Rejional Terras e Propriedades.
Aleinde nee KM nomea Herculano Sousa asumi kargu koordenador ba implementasaun Zona Ekonomika ba Dezernvolvimtu Oekusi-Ambeno (KE-ZEEDOA).
Tuir Komunidade, Abilio Elo nuudar Oekusi oan sente kontente tanba Konselhu Ministru Nomea ona Oekusi oan hodi lidera ninia rejional rasik.
Jornalista: Joseph Koa
Editor: Joseph Koa
