DILI, STLTIMORLESTE.com – Governu presiza rezolve lalais problema neebe akontese iha fronteira entre sidadaun Timor Leste ho sidadaun Indonezia foin lalais nee, nunee kria dame iha fronteira.
Liafuan nee haktuir husi Diretor FONGTIL, Valentim Pinto ba jornalista STL iha nia knaar fatin, Sesta (29/08/2025).
Nia hatete, situasaun neebe akontese iha fronteira komunidade parte rua moris ho situasaun neebe manas oituan neebe involve ona populasaun sivil no militar. Haree ba assuntu nee sujere Governu liu husi Ministeriu Negosiu Estranjeiru no Kooperasaun (MNEK) aprosima no rezolve lalais.
“Ami sujere ba Governu liu husi MNEK atu aprosima embaixada Indonezia iha TL, para forma ekipa konjunta ida hodi bele lao too terenu ba fatin neebe konfrontu para bele buka verdade no kontinua rezolve problema sira ho dalan sivika, tuir dalan diplomasia nia hodi evita labele akontese tan iha futuru. Permite populasaun sira iha fronteira tenke moris iha situasaun ida hakmatek no tenke haree malu diak, nunee idak idak bele halao ninia atividade no mantein lei neebe iha,” katak nia.
Nia dehan, Governu liu husi MNEK aprosima ho Embaixada Indonezia iha TL, hodi kria ekipa ida hodi tun rezolve problema iha fronteira, nunee komunidade sira iha fronteira bele moris iha hakmatek.
Nunee mos Visi Diretor Hak, Antonino de Limas hatete, problema iha fronteira liga ho informasaun neebe mak espalha katak Polisia Timor Leste Timor hakanek sidadaun Indonezia ida nee, Governu husi nasaun rua mak iha kompotensia atu rezolve.
“Tanba problema nee entre nasaun ida ho nasaun vizinhu, entau nee kompetensia tomak husi Governu, tanba nee husu Governu atu trata assuntu ho diak, bele oinsa ba mos iha Fronteira nee familia, tanba sorin ba mos iha familia husi mai no sorin mai mos iha familia ho sorin ba, iha parte kultura no sosiu kultural nee kait ba mai, tanba nee husu Governu atu rezolve lalais nunee la kria tan problema mai ita,” dehan nia.
Nia katak, problema diak liu buka dalan oinsa rejolve kedas, nunee sidadaun sira iha fronteira entre TL ho nasaun vizinhu bele lao ba mai livre tanba sei iha ligasaun familia deit no kultura mos hanesan.
Nunee mos Deputada Bankada CNRT Cedelizia Faria dos Santos hatete, problema iha fronteira nee problema seriu, tanba nee Governu husi parte rua mak iha kompetensia atu bele rejolve, maibe oras nee Governu TL ho nasaun vizinho halo ona negosiasaun neebe seriu oinsa bele buka solusaun ba problema refere.
Jornalista: Emerenciana Pinto
Editor: Domingas Gomes
