DILI, STLTIMORLESTE.com – Konselhu Imprensa Timor Leste (KI) liu husi Diresaun Analiza no Dezenvolvimentu Media (DADM) aprezenta rezultadu monitorizasaun produtu jornalizmu iha meiu komunikasaun sosial ba trimestre dahuluk tinan 2025.
Objetivu nee atu asegura produtu jornalizmu nian neebe ho kualidade, no asegura nafatin independensia iha sala redasaun.
Prezidente KI, Cesar Mali esplika, forum editorial ida nee kapaas tebes, tanba media sira mai hodi bele halo avaliasaun hamutuk atu produz no rekomendasaun ruma atu hadia kualidade media nia.
“Hau akonpanha ona katak rezultadu monitorizasaun presiza duni atu hadia kualidade jornalizmu, iha monitorizasaun rezultadu nee inflasaun barak neebe halo, bele dehan katak viola kode etika jornalizmu nian,” dehan Cesar Mali ba jornalista sira iha salaun konferensia KI Kintal Boot, Sesta (29/08/2025).
Prezidente KI, Cesar Mali dehan, enkontru editorial ida nee hanesan politika Konselhu Imprensa (KI) nia atu halibur komunidade media sira hotu hodi haree hamutuk ba kestaun sira hodi dezenvolve media nee ba oin.
“Enkontru hanesan nee importante tebes, bele halo avaliasaun no tau hanoin hamutuk oinsa bele dezenvolve ita nia media no jornalizmu atu sai profisional liu tan hodi bele produz notisia neebe mak ho kualidade,” katak nia
Nia dehan, servisu KI nia atu analize no halo duni monitorizasaun ba notisia sira atu nunee asegura publiku bele hetan informasaun ida neebe mak kredivel no tuir duni padraun aas kode etika jornalizmu nia.
Nunee inflasaun neebe iha dala ruma laos sala jornalista nia, maibe editor mos dala ruma ladun haree ba notisia, tanba nee mak knaar Konselhu Imprensa nia liu husi analiza monitorin, halo ida nee atu bele asegura liberdade imprensa.
Prezadu Ximenes hanesan Prezidente Asosiasaun Radio Komunidade Timor Leste dehan, aprezentasaun rezultadu neebe mak hatoo husi ekipa KI liu husi DADM sobre rezultadu husi produtu jornalizmu nia nee lao kapas tebes.
“Hau haree aprezentasaun neebe mak hatoo husi ekipa KI liu husi DADM sobre rezultadu produtu jornalizmu nia, haree katak aprezentasaun nee kapas prinsipiu fo hanoin ba jornalista sira katak durante nee iha produtu balun neebe mak presiza atu hadia hodi hakat ba oin,” nia hakotu.
Jornalista: EST 1
Editor: Xisto Mendonça
